Fëmijët e Shani S. kërkojnë dënim të përjetshëm për babanë e tyre

Ndërsa mbrojtësi i tij ka kërkuar që vepra të cilësohet si vrasje e shumëfishtë me paramendim, për të cilën nuk parashihet dënim me burg të përjetshëm

Ka përfunduar seanca e sotme e procesit gjyqësor ndaj Shani S., të akuzuar për vrasjen e dyfishtë të kryer më 15 gusht 2011. Sot në Gjykatën e Qarkut në Pfäffikon ku po zhvillohet ky proces gjyqësor, është lexuar pledoajeu e avokatit të të akuzuarit dhe ai i përfaqësuesit të padisë.

Mbrojtësi i Shani S. duke folur për “rrethana specifike” në rastin e klientit të ij ka kërkuar që të hiqet dorë nga cilësimi i veprës penale si vrasje e shumëfishtë e rëndë ose e kualifikuar. Ai ka kërkuar që vepra të cilësohet si vrasje e shumëfishtë me paramendim, për të cilën nuk parashihet dënim me burg të përjetshëm. Por ai nuk ka përmendur një kohëzgjaje të caktuar të heqjes së lirisë për klientin e tij, duke ia lënë këtë trupit gjykues.

Nga ana tjetër jo vetëm prokuroria dhe avokatët e palëve të dëmtuara por edhe të gjithë, gjashtë fëmijët e moshës madhore të dorasit janë shprehur për dënimin maksimal, domethënë për dënimin me burg të përjetshëm. Përfaqësuesi juridik i fëmijëve ka thënë në pledoajenë e tij të mbajtur të premten se të mbrojturit e tij “kërkojnë që të lihen të jetojnë të qetë dhe në siguri sa më gjatë që të jetë e mundur”. Pasi që kërcënimet me vdekje që i ka shqiptuar sipas tyre, babai, kanë qenë të vazhdueshme.

Në seancën e sotme, avokati i kosovarit ka kërkuar të hidhet poshtë ekspertiza e prezantuar në këtë proces dhe që të bëhet një ekspertizë tjetër, pasi që asaj, sipas tij, i mungon objektiviteti. Por, trupi gjykues ka hedhur poshtë këtë kërkesë.

Shani S., me dy fjali të shkurtra, ka kërkuar falje para të pranishmëve për krimin e bërë, njofton “Zürcher Oberländer”, dhe pas kësaj ka përfunduar seanca e sotme

Vendimi gjyqësor pritet të merret pas një jave.

Vrasja e dyfishtë e kryer më 15 gusht 2011 në Pfäffikon të Cyrihut pati bërë jehonë të madhe në opinionin zviceran. Sipas përshkrimit në aktakuzë, ditën kritike Shaniu, i cili, për shkak të kërcënimeve të mëparshme, e kishte të ndaluar t`i afrohej bashkëshortes (Sadete S.), ka përcjellë atë gjatë pauzës së drekës kur ajo po shkonte drejt shtëpisë. Enxjerr revolen nga xhepi dhe e qëllon Sadeten nga afërsia e drejtpërdrejtë. Ajo vdes në vend.

Më tutje, Shaniu shkon drejt ndërtesës së komunës ku pret se cila nga dy nëpunëset përgjegjëse për çështje sociale do të dilte e para. E para doli Daniela H., shefe e entit social dhe përgjegjëse e drejtpërdrejtë e tij (si përfitues i ndihmave sociale) dhe ai e qëlloi atë me revole drejt në kokë. Daniela vdes në spital, pak orë më vonë.(albinfo)