Favorizimet e UP-së me stafin akademik

Punësimi si staf akademik në Universitetin e Prishtinës (UP) “Hasan Prishtina” nuk është i lehtë. Madje, edhe në qoftë se plotëson kriteret e konkursit, vullneti dhe dëshira për t’u bërë mësimdhënës në këtë universitet të “kushton”.

Muaj e vite pa rezultat në ankesat e bëra, pas konkurseve, është ajo me të cilën ndeshet shumica e kandidatëve që synojnë titullin e profesorit universitar. Jo pak kandidatë për asistentë në Fakultetin e Mjekësisë janë të revoltuar me mospërgjegjësinë e dekanatit dhe Rektoratit, ndaj ankesave të bëra nga ata (kandidatët) lidhur me raportin e komisionit vlerësues për përzgjedhjen e stafit akademik për disa lëndë. Ndaj këtij raporti të publikuar në buletinin numër 31, në gusht janë bërë disa ankesa prej kandidatëve që në konkursin e muajit maj-qershor aplikuan për t’u punësuar si asistent.

Sipas burimeve të “Zëri”-it, nga gjithsej 25 kandidatë të cilët kanë aplikuar për këto lëndë, është dhe kandidati Dashnor Alidema, i cili vazhdon studimet e doktoratës në programin ndërkombëtar të Tempus-it për biomjekësi eksperimentale në shtetin austriak. I kontaktuar nga gazeta, Alidema ka thënë se ka bërë një ankesë në Dekanat kundër vlerësimit të bërë për të.

“I kam plotësuar kushtet e parapara në konkurs, por komisioni vlerësues nuk më ka dhënë recensionin pozitiv. Prandaj, kam reaguar në lidhje me recensionet. Kam kërkuar të shqyrtohet dhe njëherit të anulohet vendimi i komisionit vlerësues-recensues për lëndët ortodonti paraklinike, etikë mjekësore dhe historiati i stomatologjisë ku kam konkurruar”.

Ai thekson se është kandidati i vetëm nga të gjithë aplikantët që ka plotësuar shumicën e kritereve të parapara me konkurs. “Përveçse plotësoj kriterin e moshës dhe kam notën mesatare mbi 9, gjithashtu aktualisht ndodhem në studime të doktoratës…dhe jam specializant në drejtimin e Ortodoncisë-Ortopedisë së Nofullave, pranë lëndëve ku është shpallur konkursi”, tha Alidema për “Zërin”…(Zëri)