Fatmir Sejdiu, përfshihet në zgjidhje të krizës

Ish-presidenti, Fatmir Sejdiu, është përfshirë në zgjidhje të krizës politike në të cilën është futur vendi pas 17 korrikut, kur Kuvendi ka dështuar ta zgjedhë kandidatin e PDK-së për kryeparlamentar, ndërkohë që emërimi i mëpastajmë i Isa Mustafës është vlerësuar të ketë qenë antikushtetues.

Burime të Tribunës kanë konfirmuar se Sejdiu është duke u kontaktuar nga përfaqësues diplomatik të akredituar në Kosovë, me synim të gjetjes së një modusi për kapërcimin e ngërçit.

Gjithnjë, sipas të njëjtave burime, ish-presidentit është duke iu kërkuar një qasje më proaktive në këtë proces për shkak të eksperiencës së tij, qoftë si zyrtar i lartë i shtetit, qoftë si njohës i fushës juridike.

Në vitin 2006, Sejdiu ka qenë figura më e pranuar jo vetëm në LDK, por edhe në stafin e diplomatëve të jashtëm, për ta pasuar Ibrahim Rugovën, në postin e të parit të shtetit. /Tribuna/