Falsifikimi i një note verbale sfidon marrëdhëniet me SHBA-në

Mehmet Morina nuk e drejton më Departamentin për Çështje Konsullore të Ministrisë së Punëve të Jashtme të Kosovës.

Burime të Kohës Ditore të afërta me MPJ-në kanë thënë të shtunën se Morina është suspenduar nga detyra e tij pas falsifikimit të notave verbale për grupe të njerëzve për pajisje me viza për Shtetet e Bashkuara të Amerikës.

Të njëjtën ditë, në MPJ e kanë konfirmuar zyrtarisht suspendimin e Morinës, por kanë thënë që ai ta ketë nënshkruar gabimisht një notë verbale bazuar mbi një ftesë që një kishë nga SHBA-ja i kishte bërë Ministrisë së Diasporës.

Ambasada e SHBA-së në Prishtinë nuk ka dashur që të komentonte për rastin. Burimet e “Kohës Ditore” të afërta me MPJ-në kanë treguar se suspendimi i Morinës nga detyra e tij ka ardhur të martën e kësaj jave si pasojë e dërgimit të dokumentacionit të falsifikuar për viza të SHBA-së.

Vendimin për suspendim e ka marrë sekretari i përgjithshëm i MPJ-së, Nagip Skënderi, me rekomandim të Ambasadës së SHBA-së në Prishtinë. Në vend të Morinës në pozitën e ushtruesit të detyrës është emëruar Korab Mushkolaj.

Sipas burimeve të sigurta, kërkesat për viza me dokumentacion të falsifikuar janë dërguar në MPJ nga Ministria e Diasporës dhe ajo e Bujqësisë, ndërsa i implikuar drejtpërdrejt në këtë rast ka qenë vetëm Morina.

Burimet kanë thënë se incidenti ka shkaktuar probleme të mëdha në relacion me Shtetet e Bashkuara të Amerikës, duke marrë parasysh se falsifikimet me qëllim të marrjes së vizave amerikane përbëjnë kërcënim edhe për sigurinë e SHBA-së, dhe si të tilla konsiderohen vepër e rëndë kundër këtij shteti.