Falangat fashiste ia shkaktuan vdekjen klinike Maqedonisë

Nga Sadri Ramabaja – Falangat fashiste i shkaktuan vdekjen klinike Maqedonisë. Maskat e falangave fashiste pushtuan Parlamentin e Maqedonisë. Ato nuk e duronin dot zgjedhjen e një shqiptari në krye të këtij Parlamenti; nuk e pranojnë dot një Maqedoni të re, ku shqiptarët janë komb shtetformues.

Zgjedhja e Talat Xhaferit në pozitën e kryetarit të Parlamentit do vlerësuar si hap i madh drejt shmangies së përplasjes ndëretnike; por ky hap realisht është tepër i vogël, për të mos thënë i vonuar, drejt një zgjidhjeje paqësore në procesin e madh të ndryshimeve që e presin Maqedoninë.

Seanca e përgjakur e katër prillit, megjithatë i hapi rrugë nominimit të kryeministrit; ajo krijoi parakushtin legal edhe për zgjedhjen e qeverisë nga ato forca politike që janë përcaktuar për një Maqedoni moderne (bartës të së cilës do të jenë shqiptarët dhe maqedonasit). Por, a do të ketë forca LSDM-ja dhe faktori shqiptar atje ta vënë situatën nën kontroll, kur dihet se këto falanga raciste janë pjesë e VMRO/DPMN-së? Vështirë e besueshme.

Duke i parë pamjet e huliganëve të uniformuar dhe atyre me maska e pa maska, konkluzioni është i prerë: shteti i Maqedonisë sonte përjetoi vdekjen klinike. Rikthimi në jetë i Maqedonisë, dalja nga ky kaos, mund të bëhet vetëm me reagimin e fuqishëm të faktorit perëndimor, para së gjithash të ShBA-së.
Natyrisht edhe pala shqiptare në këtë kuadër (Tirana, para së gjithash, por edhe Prishtina), duhet të pushojnë së reaguari nga pozitat e mjerimit politik alla rugovist, duke bërë thirrje për paqe në adresë të fashistëve dhe racistëve!

Akuza e Zajevit e drejtuar në adresë të Rusisë, si faktor ndikues në këtë kaos, duhet të merret me shumë seriozitet.
Maqedonia edhe në dekadën e dytë të shek. XXI mbetet pika më nevralgjike e përplasjeve të interesave të fuqive jashtëballkanike, siç ishte edhe në epokën e shpërbërjes së Perandorisë Osmane dhe në përfundim të Luftës ës Dytë Botërore. Një operacion ushtarak në formën e KFOR-it mbetet mundësia e vetme e vënies nën kontroll të këtij kaosi. Në të kundërtën kaosi do ta përfshijë gjithë rajonin.