Fundamenti

Fakte në lidhje me Kadri Veselin dhe SHIK-un

/ 7 minuta lexim

Pas anëtarësimit zyrtar të Kadri Veselit në Partinë Demokratike të Kosovës në pushtet, Gazeta Jeta në Kosovë rikujton fakte dhe data të rëndësishme në lidhje me aktivitetin e tij dhe të Shërbimit Informativ të Kosovës.

Kadri Veseli ka deklaruar mbylljen zyrtare të Shërbimit Informativ të Kosovës (SHIK) më 14 qershor 2008, në një deklarim të transmetuar në Radio Televizionin e Kosovës, RTK.

Intervistën e parë televizive pas-luftës ku ka folur gjerësisht për aktivitetet e tij e ka dhënë në televizionin Klan Kosova më 29 dhjetor 2009. Në atë intervistë, Veseli ka thënë se ka qenë i angazhuar në Lëvizjen Popullore të Kosovës (LPK) që nga vitet ’80-të dhe se aksionet e para të armatosura të Ushtrisë Çlirimtare të Kosovës (UÇK) ishin marrë më 1991-92.

Më 20 qershor 2012, gjatë një dëshmie në rastin “Bllaca II” në Gjykatën e Qarkut në Prishtinë i ftuar nga prokuroria, Veseli ka thënë se para të merrte detyrën si shef i SHIK-ut në mars të 1999-ës kishte qenë shef i Zbulim-Kundër-Zbulim, një shërbim spiunazhi i Ushtrisë Çlirimtare të Kosovës (UÇK).

Për krijimin e SHIK-ut, thoshte ai, ishin pajtuar nënshkruesit e marrëveshjes së Rambujesë 1999 – Hashim Thaçi, më vonë kryeministër i Qeverisë së Përkohshme, Ibrahim Rugova më vonë President i vendit, Rexhep Qosja si dhe dy publicistët Veton Surroi e Blerim Shala.

Sipas Veselit, Shërbimi Informativ i Kosovës kishte nisur të funksiononte në kuadër të Qeverisë së Përkohshme të Kosovës deri në janar të vitit 2000. Atë vit dhe më 2001, ishin bërë biseda për legalizimin e SHIK-ut ndërsa liderët e vendit, thoshte Veseli, kanë qenë të informuar për aktivitetet e kësaj organizate.

Në procesin gjyqësor “Bllaca 2” gjenden Shaban Syla, Bekim Syla, Shpresim Uka, Sadik Abazi, Fahredin Gashi e Driton Hajdari të cilët akuzohen për vrasjen e Ibush Kllokoqit dhe tentimvrasjen e Adem Salihajt e Ismet Arifit, pas luftës.

Nazim Bllaca, një vrasës i vetë-deklaruar i cili po ashtu tani është dëshmitar, pohon se ka kryer vrasje në emër të SHIK-ut dhe se ka qenë anëtar i kësaj organizate. Gjykata nuk ka nxjerrë ndonjë vendim në të cilin shihet ndërlidhja mes SHIK-ut dhe këtyre aktiviteteve.

Deri më tash Fahredin Gashi dhe Hysni Rama janë dënuar e burgosur bazuar në dëshmitë e Bllacës – për krime lufte.

Veseli i ka mohuar në gjykatë të gjitha akuzat e Nazim Bllacës që e ndërlidhin SHIK-un duke e quajtur gënjeshtar dhe po ashtu ka mohuar që Bllaca ka qenë anëtar i kësaj organizate. Të njëjtën gjë, Veseli në gjykatë e ka bërë edhe për Naim Miftarin — një person tjetër që është deklaruar si pjesëtar i SHIK-ut dhe që ka dhënë deklarata në cilësinë e dëshmitarit në rastin “Bllaca II” — duke e quajtur “manipulant të naftës”.

Në një skemë që Veseli ia ka dorëzuar gjykatës, shihet se ai ishte numri një i Shërbimit Informativ të Kosovës dhe pasohej nga Elmi Reqica si zëvendësshef i SHIK-ut. Reqica tani është deputetet në Parlamentin e Kosovës nga PDK. Latif Gashi, po ashtu tash deputet i PDK-së, ishte Drejtor i Përgjithshëm e deputeti tjetër i kësaj partie Fatmir Xhelili udhëhiqte Drejtorinë Kundër Krimit të Organizuar në SHIK. Po ashtu një deputet tjetër i PDK-së Fadil Demaku udhëhiqte drejtorinë kundër terrorizmit e ish-drejtori i Trepçës Ferat Shala udhëhiqte drejtorinë e Intelegjencës, ndërsa Ilmi Ramadani udhëhiqte Drejtorinë e Informimit e Analizave.

Sipas Veselit, SHIK-u kishte 32 anëtarë kur ishte ngritur ndërsa 92 më 2008.

RCCOLA

Në korrik të sivjetmë, një raport i një hetuesi të EULEX-it ngrinte dyshime se dhjetëra anëtarë të Lidhjes Demokratike të Kosovës (LDK), aktualisht në opozitë, ishin vrarë vetëm pse ishin kundërshtarë të PDK-së. Raporti i nënshkruar nga hetuesi Gary Fainsworth, që ka të bëjë me hetimet e krimeve të ndryshme, thekson se më 3 tetor 2011 është lëshuar një “dokument i klasifikuar” me qëllim të shqyrtimit të tipit të vrasjeve profesionale dhe veprat penale të ndërlidhura me to, që janë kryer ndërmjet 1999 dhe 2001, të personave me lidhje të njohura ose me ish-regjimin serb apo me Lidhjen Demokratike të Kosovës. Gazeta nuk ka evidencë se SHIK-u ndërlidhet në atë raport direkt me këto veprime.

Kundër Kadri Veselit nuk ka pasur asnjë hetim të shpallur ose aktakuzë të regjistruar nga organet e drejtësisë në vend.

Po ashtu, deputeti i Partisë Demokratike të Kosovës, Azem Syla, për të cilin Nazim Bllaca ka pohuar se ka dhënë urdhra në hierarkinë e SHIK-ut, është liruar javën e kaluar nga hetimet në mungesë të provave.

Më 6 gusht 2012, kryetari i komisionit parlamentar për Mbikëqyrjen e Agjencisë së Kosovës për Inteligjencë (AKI), Florin Krasniqi, kishte bërë të ditur se kishte mbledhur 27 nënshkrime të deputetëve për të ngritur një komision për hetimin e aktiviteteve të Shërbimit Informativ të Kosovës (ShIK). Duheshin 40 nënshkrime për ngritjen e tij.

Kadri Veseli dhe ish-drejtuesit e SHIK-ut në Biznes

Gazeta Jeta në Kosovë kishte zbuluar në muajin mars 2012 se Kadri Veseli më parë kishte në bashkëpronësi një kompani në Zvicër që merrej me tregtinë e kompjuterëve me emrin “FK Computers” ndërsa kishte shërbyer për vite edhe si shef ekzekutiv i kompanisë “Kobit PC” në Kosovë.

Në shtator 2012, gazeta ka zbuluar edhe se kompania “Kobit PC”, kishte kontrata për furnizim me pajisje teknologjike me Zyrën e Kryeministrit dhe Këshillin e Sigurisë së Kosovës.

Ndër konsumatorët privatë të Kobit PC ndërkohë, sipas faqes së saj në internet, ishte edhe edhe “Kosova Petrol”, prone e Bedri Selmanit, ish-deputet në Kuvendin e Kosovës nga PDK-ja dhe ish-këshilltar i Hashim Thaçit. Selmani po ashtu është pronar i “Hotel Victory”, ku është mbledhur partia e Kryeministrit aktual në kuvendet e saj dhe që sipas Agjencisë Kosovare të Privatizimit (AKP) është ndërtuar kundërligjshëm në pronë shoqërore.

Në muajin prill, gazeta po ashtu ka raportuar se Bedri Selmani ka përfituar nga shfrytëzimi i më shumë se 20 pompave të naftës që i takonin ndërmarrjes shoqërore “INA” pa paguar asgjë për dhjetë vjet, duke i dëmtuar kështu institucionet e Kosovës me mbi katër milionë euro.

Më 25 qershor, Gazeta Jeta në Kosovë ka publikuar një hulumtim që zbulonte se një kompani në Drenas “Trasing Group” që këshillohej nga Ferat Shala, ish-drejtor kundërzbulimi në SHIK, dhe që kishte për menaxher të kompanisë një deputet të PDK-së në asamblenë e komunës, kishte fituar 15 tenderë publikë nga komuna, disa prej të cilave ishin kritikuar nga autoritetet relevante. Shala kishte dhënë dorëheqje nga “Trepça” më 13 korrik 2012.

Prokurime publike nga komuna e udhëhequr prej të vëllait të tij ka fituar edhe një kompani tjetër që këshillohet nga deputeti Fadil Demaku, “Ada Consulting Group”. Fadil Demaku ishte drejtor i kundër-terrorizmit në SHIK. /gazetajnk/