Facebook Kosova!

Nga -Behxhet Haliti- Kosova ka ecur përpara.Sidomos në diplomaci. Dhe, sidomos në lobim për njohjen e shtetit të pavarur të Kosovës…

Pak statistikë.

Kosovën, vetëm në muajin shkurt 2008 (nga 17 shkurti e deri më 29 shkurt), e njohën 21 shtete.

Kosovën, vetëm në vitin e parë të pavarësisë (më 2008), e njohën 53 shtete.

Pastaj, gjatë viteve në vazhdim, trendi i njohjeve u zvogëlua për tri herë.

Ja pse!

Një vit pas pavarësisë (më 2009), në Prishtinë erdhën 11 nota verbale.

Dy vjet pas pavarësisë (më 2010), në Prishtinë erdhën vetëm e vetëm 8 nota verbale.

Më 2011, Kosovën shtet e njohën edhe 13 vende të botës.

Ndërsa më 2012, pra deri më tash, në Ministrinë e Punëve të Jashtme të Kosovës figurojnë se kanë ardhur 6 njohje, duke llogaritur edhe njohjet pa nota verbale të Nigerisë dhe të Ugandës…

Numrin e përgjithshëm të njohjeve të Republikës së Kosovës nga shtetet e botës nuk po e përmendim, sepse më herët u kontestua nga dikush: janë kaq apo kaq!

Nuk do t’i përmendim as lojërat e pingpongut ndërmjet vetë zyrtarëve tanë: jo ti, po unë!

Nuk do t’i zëmë në gojë as strategjitë e famshme për lobim.

As përpjekjet e pasuksesshme të atyre që e kanë për detyrë edhe lobimin dhe të cilët kaluan kohë e kohë nëpër aeroplanë për të bindur shtetet e ndryshme të botës që ta njohin shtetin e pavarur të Kosovës…

Këto ditë, sa i përket njohjeve, na u dha një lajm sihariq: Kosova do të lobojë për njohje nëpërmjet diplomacisë digjitale!

Kjo nuk është shpikje e gazetarëve.

Kështu thanë zyrtarë të lartë të MPJ të Kosovës: “Përpjekjet për shtimin e njohjeve të Republikës së Kosovës nga infrastruktura globale, nga ueb-faqet, ndikimi i përmbajtjes së Kosovës në burimet kryesore të informacionit online, janë disa nga karakteristikat që do të përfshihen në formën e diplomacisë digjitale për Kosovën. Ministria e Punëve të Jashtme është duke bërë përpjekje në shtimin e njohjeve nëpërmjet diplomacisë digjitale…”.

Edhe këtë ditë e pritëm!

Pse jo, jetojmë në epokë të teknologjisë së avancuar, jetojmë në “fshat global” dhe ta provojmë edhe këtë. Tekefundit, një shtet nga i cili jemi shkëputur njëherë e përgjithmonë, Serbia, moti e përdor internetin për “luftë” kundër Kosovës. T’ia nisim edhe ne…

MPJ nuk e thotë, por propozimi im është të lobojmë online edhe me Facebook, me Twitter, me YouTube e me rrjete të tjera sociale (nejse, do të jetë problem dërgimi i notave verbale me këtë formë, por do t’ia bëjmë disi!).

Dhe, nëse e shohim se po na ecin mirë njohjet online me Facebook, me Twitter e me YouTube, në të ardhmen, për shembull, do të bëjmë përpjekje ta zgjidhim edhe problemin e valë të veriut të Kosovës online me Facebook, me Twitter e me YouTube…

Rroftë Facebook Kosova!