EULEX me raport për krimet politike

Një raport ku përshkruhen krimet politike në Kosovën e pasluftës do të shqyrtohet të premten në seancën gjyqësore ndaj Sadik Abazit, Fahredin Gashit, Shpresim Ukës, Shaban Sylës, Bekim Sylës e Driton Hajdarit, të njohur për gjykatën si rasti “Bllaca 2”, e të cilët akuzohen për vrasjen e Ibush Kllokoqit dhe dy tentim vrasje.

Se misioni EULEX posedon një raport të tillë e ka konfirmuar të mërkurën prokurorja e rastit Emma Rizato gjatë seancës teknike që është zhvilluar të mërkurën përkitazi me këtë rast në Gjykatën Supreme të Kosovës. Ndonëse ishte paralajmëruar seancë e rregullt, mungesa e një anëtari të trupit gjykues ka bërë që seanca e së mërkurës të jetë vetëm e natyrës teknike ndërsa të enjten dhe të premten do të mbahen seanca të rregullta.

Të enjten në cilësinë e dëshmitarit të propozuar nga Prokuroria pritet që të dëshmojë Naim Miftari, i cili pretendon se ka qenë pjesë e Shërbimit Informativ të Kosovës.

“Naim Miftari do të dëshmojë në lidhje me përvojat e tij sa ka qenë në SHIK, marrëdhëniet e tij me viktimën e këtij rasti Ibush Kllokoqin, si dhe do të ofrojë detaje rreth shoqërimit të tij me Nazim Bllacën”, ka bërë me dije prokurorja Rizato.

E në vazhdën e seancave ajo ka paralajmëruar diskutimet rreth një raporti mbi hetimet e krimeve politike që janë kryer në Kosovë. “Unë do të paraqes raportin e një hetuesi lidhur me disa hetimeve të krimeve politika dhe do të diskutojmë nëse është e nevojshme që ta ftojmë atë hetues në cilësinë e dëshmitarit”, ka paralajmëruar prokurorja.

Diskutimi për këtë raport nuk është kundërshtuar nga mbrojtja derisa marrja në pyetje e Naim Muiftarit, sipas mbrojtëses së Shpresim Ukës, avokates Fehmije Gashi- Bytyqi, është e panevojshme.

Mbrojtësi i Fahredin Gashit, avokati Tahir Rrecaj, ndërkaq sërish është thirrur në problemet shëndetësore që ka klienti i tij. Ai madje ka paraqitur edhe kërkesën që ndaj klientit të tij të bëhet një super-ekspertizë për shkak se sipas tij, ka kundërthënie mes konstatimeve që kanë dhënë mjekët në spital dhe ata në burg.

Ai ka ripërsëritur se klienti i tij ka probleme psikike, ndërsa ka propozuar ekspertizë për t’u vërtetuar nëse problemet e tilla, Fahredin Gashi i ka pasur edhe gjatë kohës kur prokuroria e akuzon se ai ka marrë pjesë në kryerjen e veprave penale.

Rrecaj ka kërkuar që të ndërpritet procesi deri në rezultatet e kësaj super-ekspertize. Trupi gjykues ndërkaq ka caktuar dy seanca për këtë javë dhe shtatë të tjera në fillim të muajit shtator.(zeri)