EULEX dorëzohet para atyre që sulmuan me bomba policinë e Kosovës

Misioni i Bashkimit Evropian për Sundimin e Rendit dhe Ligjit ka shprehur vetëm keqardhje për sulmin që ka ndodhur në Zubin Potok, duke treguar pafuqinë e tij, për të vendosur rendin dhe ligjin në atë pjesë.

Përmes një komunikate EULEX-i ka shprehur keqardhje për sulmin që ndodhi në Zubin Potok në orët e para të mëngjesit.

“Kjo ishte një sfidë e qëllimshme për tërë sundimin e ligjit në Zubin Potok. EULEX-i ka qenë në gjendje t’i ofroj ndihmë policisë lokale dhe ne vazhdim do të kryhen hetime të përbashkëta”, thuhet në reagimin e tyre.

Me tutje, ata janë shprehur se me mbështetjen e KFOR-it, ekipi mentorues i EULEX-it është përpjekur të arrij në stacionin policor në Zubin Potokut për ta kryer punën e vet.

“Lidhur me incidentin e natës së kaluar, ne në veçanti deshëm për të ndihmuar policinë e stacionit në Zubin Potok. Për fat të keq, ne kemi qenë të bllokuar nga një turmë e qytetarëve vendorë dhe u detyruam të kthehemi në Mitrovicë më pare se të rrezikojmë dhunë të mëtejshme për popullsisë lokale”, thuhet me tutje në komunikatë.

Ata kanë theksuar se EULEX-i do të vazhdojë të kërkojë të kryej punën e vet dhe i bënë thirrje të gjithë qytetarëve t’i binden ligjeve në mënyrë që ta ndihmojnë EULEX-in ta kryej punën e vet.(express)