Është prezantuar plani rregullues i hollësishëm për zonën ekonomike në Budrikë

Viti – Përfaqësuesit e kompanisë “Vision Project”, kanë prezantuar sot para qytetarëve planin rregullues të hollësishëm “Zona ekonomike me status parku industrial” në Budrikë.

Zv. Kryetari i komunës Hasan Aliu, duke folur rreth rëndësisë që ka ky plan, ka njoftuar edhe me procedurat që ka kaluar dhe që do të kaloj deri në miratimin e tij në Kuvendin komunal. Debatet me qytetar janë të rëndësisë së veçantë pasi që detajohen gjitha çështjet që kanë të bëjnë me planin , duke i inkorporuar edhe vërejtjet dhe propozimet e qytetarëve dhe mekanizmave tjerë që do të involvohen aty.

Përfaqësuesit e kompanisë “Vision Project”, kanë theksuar se plani në tërësi është hartuar duke u bazuar në gjitha ligjet në fuqi, ndërkohë që kanë dhënë shpjegime të hollësishme duke u nisur nga gjendja ekzistuese, përparësitë dhe mundësit e zhvillimit, dobësitë, si dhe kërcënimet nga vërshimet e mundshme.

Po ashtu janë prezantuar edhe sipërfaqet e dedikuara për industrinë, pavarësisht nga vendndodhja e tyre ku janë dhënë edhe karakteristikat e përbashkëta. Gjithashtu janë prezantuar edhe çështjet mjedisore dhe objektivat, cilësinë e ajrit, ndikimet negative, strategjitë tjera siç është menaxhimi i mbeturinave të ngurta etj.

Të pranishmit në këtë debat, kanë parashtruar edhe pyetje lidhur me atë që u intereson, siç është problemi i vërshimeve në atë pjesë, çështja e definimit të disa parcelave private aty afër etj./rajonipress/