Erzen Rrustemi shënoi fitoren e dytë në boksin profesionist

Gjilan – Boksieri kosovar nga Zhegra e Gjilanit e ka tejkaluar edhe sfidën e dytë në boksin profesionist, duke mundur turko-gjermanin Muhammad Ali Durmaz me nokaut (2-0 KO).

Rrustemi ka thënë se ishte përgatitur mirë, duke e ditur se kundërshtari i tij, kishte 21 meçe profesioniste dhe 7 prej tyre të fituara me nokaut.

Unë arrita ta përballojë mjaft mirë atë dhe në rundin e dytë, me disa goditje të sakta e të forta ia dola ta përfundoj meçin para kohe, ka thënë boksieri kosovar Erzen Rrustemi, duke nënvizuar se përballë pati një kundërshtar i cili ka kryqëzuar dorëzat me emër të mëdhenj të boksit, si Aleksander Povetkin, ish-kampion i botes në WBA, Marko Huck, kampion aktual i botës në WBO dhe të tjerë.

Rrustemi planifikon që sivjet të zhvillojë edhe duele tjera dhe ta avancojë rekordin e tij personal sa më shumë që mundet. Është i përgatitur që t`i zhvillojë tri-katër ndeshje brenda vitit. Sportet luftarake janë dashuria e tij e hershme.

Traditën e lojërave të mundjes në vendlindje, ai e ka avancuar në boksin profesionist, në Zvicër, ku startoi vitin e kaluar, me fitore të shkëlqyeshme ndaj hungarezit Atila Toth, të cilin e mundi në rundin e tretë me KO.

Rrustemi po dëshmon se është boksier me perspektivë. Ekspertët e boksit thonë se ai di të zotërojë mirë ringun dhe ta mbizotërojë kundërshtarin. Ka konstrukt fizik që i jep bukuri ringut. Për Rrustemin, boksi është 50 për qind shkathtësi fizike dhe 50 për qind inteligjencë.

Dëshira e tij është që të boksojë në Kosovë. “Askund nuk do të ndihesha më i fuqishëm se në Kosovë, përballë çdo kundërshtari”, thotë Erzen Rrustemi. /rajonipress/