Era e fundit në Kamenicë ka shkaktuar dëme në vlerë të 300 mijë eurove

Gjilan – Ruxhdi Qehaja nga Drejtoria për mbrojtje dhe shpëtim tha për rajonipress se nga era e fundit që përfshiu Kamenicën dhe fshatrat e saja konsiderohet se dëmi arrin në 300 mijë euro. Mbi 80 shtëpive u janë dëmtuar pullazet, tri shtëpi janë dëmtuar rëndë në Busavat kurse në Shipashnicë është dëmtuar xhamia e fshatit.

Era e fuqishme që përfshiu Kamenicën dhe disa fshatra ka shkaktuar dëme të konsiderueshme të pullazeve të shtëpive. Drejtoria për mbrojtje dhe shpëtim e Kamenicës sipas vlerësimeve të saj nga tereni ka konstatuar se mbi 80 shtëpi i kanë kulmet e dëmtuara. Vlera e dëmit sipas Ruzhdi Qehajës drejtor për mbrojtje dhe shpëtim arrin në mbi 300 mijë euro.

Qehaja tha për rajonipress se kjo shumë është e papërballueshme për Komunën e Kamenicës.”Ne jemi duke u përgatitur me shënime të sakta dhe shumë shpejt do t`i deponojmë dëmet dhe vlerën e saktë të tyre në Ministrinë e Punëve të Brendshme e cila pastaj ua shpërndanë ministrive përkatëse. Besoj që Ministria e Pushtetit Lokal duhet të bëjë kompensimin e dëmeve” tha Qehaja.

Qehaja tha se janë tri shtëpi në Busavatë që janë dëmtuar tërësisht dhe xhamia në Shipashnicë e cila është plasaritur shumë. “Në fillim ka qenë Kryqi i Kuq ai që ka ndihmuar disa familje, por këto ndihma të përkohshme nuk janë të mjaftueshme që banorët e goditur ta kalojnë këtë situatë” tha Qehaja./rajonipress/