Ellis: Rreziku nga ndarja

Mark Ellis, analist ndërkombëtar, njëherësh, drejtor i Asociacionit Ndërkombëtar të Avokatëve ka deklaruar se ekziston rreziku për ndarjen e veriut nga Kosova.
Ellis, në një intervistë për Evropën e Lirë thekson se shteti i unifikuar, me veriun e integruar do të ishte gjëja më e mirë për Kosovën.

“Mendoj, se fatkeqësisht ekziston rrezik i theksuar për ndarje. Dhe them fatkeqësisht sepse mendoj se shteti i unifikuar, me veriun e integruar është gjëja më e mirë për vendin. Por, fakt është se kur shikoni shumicën e serbëve në pjesën veriore, ata thjesht refuzojnë qeverisjen e Prishtinës”, tha Ellis.

Ellis ka theksuar se është më vështirë të ketë dialog, kur është një president që nuk e njeh legjitimitetin e Kosovës si shtet. Megjithatë, ai tha se dëshira e Serbisë që të integrohet në BE do të bëjë që të kërkohet nga ajo të jetë shumë më e hapur në planin afatgjatë për vazhdimin e dialogut.

“Mendoj se është më vështirë tash të zhvillohet një dialog, derisa kemi deklarata nacionaliste të qeverisë së re të Serbisë. Por, besoj se ekziston një trend më pozitiv, që e kemi parë në vitet e fundit, i cili sugjeron se në planin afatgjatë, Serbia duhet ta pranojë legjitimitetin e Kosovës, duhet ta pranojë Kosovën si fqinje dhe është më mirë që të ketë këso lloj raportesh.

Mendoj se kjo do të ngadhënjejë në planin afatgjatë. Por, në planin afatshkurtër do të kemi lëkundje për shkak të pozicionit aktual të qeverisë serbe kundrejt Kosovës”, tha ai.