Eliminimi i deponive të mbeturinave Gjilanit i kushton 15 mijë euro

Gjilan – Ismet Hajdini drejtor i inspeksionit komunal tha për rajonipress se kanë përgatitur një plan ideor për eliminimin e deponive ilegale të mbeturinave e cila komunës i kushton hiq më pak se 15 mijë euro.

Drejtoria e Inspeksionit Komunal ka përgatitur një plan ideor ku pritet të angazhojë edhe kompaninë “Higjiena” për të eliminuar mbeturinat e ndryshme që përfshijnë mbeturina të karakterit ndërtimor, bujqësor etj.

Ismet Hajdini drejtor i inspeksionit komunal tha për rajonipress se inspektorët e ambientit në bashkëpunim me kompaninë e mbeturinave “Higjiena” pritet të ndërmarrin një aksion për eliminimin e deponive të mbeturinave që shkaktohen nga qytetarët e pandërgjegjshëm. ”Ne nuk do të lejojmë tutje degradimin e ambientit të cilat paraqesin pamje jo të mira mjedisore. Ne për çdo ditë jemi në teren dhe po identifikojmë deponitë ilegale të mbeturinave, lokacionin e tyre, llojin, sasinë e mbeturinave si dhe mënyrën e eliminimit të tyre”.

Hajdini tha se nga vizita e inspektorëve të ambientit është konstatuar se lloji i mbeturinave të hedhura nëpër lokacione të ndryshme kryesisht është i karakterit ndërtimor e më pak i amvisërisë.

Aksioni që pritet të merret në vijim sipas Hajdinit ka për qëllim të përmirësojë gjendjen mjedisor si dhe të ndikojë në vetëdijesimin e popullatës për ruajtjen e mjedisit .

Inspektorët e mjedisit kanë hartuar një plan ku parashihet intervenimi në disa lagje të mëdha të qytetit./rajonipress/