Elda Bunjaku fituese e Festivalit të Këngës për Fëmijë “Lyra Fest”

Gjilan – Elda Bunjaku me këngën “Bota e Patit” me tekst e orkestrim të Kushtrim Jakupit, është fituese e Festivalit të Këngës për Fëmijë “Lyra Fest”, i cili edhe këtë herë është mbajtur në Gjilan e në të cilin kanë marrë pjesë 17 këngë, të kënduara në Palestrën e Sporteve që ishte e mbushur përplot.

Çmimin e dytë e kanë ndarë këngët “Det o det” e kënduar nga Leart Shabani dhe kënga “Kanarina” e kënduar nga Adea Latifi, derisa vendin e tretë e zuri Blendi Kastrati me këngën “Prindërit e mi”.

Këngët më të mira janë përzgjedhur nga juria profesionale në përbërje Sami Piraj (kompozitor), Shqipe Halili (redaktore e muzikës) dhe Xhentian Jetishi (profesor i solokëndimit).

Edhe juria “Lyra” në përbërje Kaona Sylejmani (aktore), Anila Aliu (pianiste) dhe Elona Sadiku (kompozitore) çmimin special i ka ndarë solistes Vjollca Osmanit që këndoi këngën “Vallëzo”.

Çmime morën edhe Triola Jakupi me këngën “Kësulëkuqja” për paraqitjen më të mirë skenike, Era Mustafa me këngën “Indiani në Kosovë” që mori çmimin e festivalit, Elona Alshiqi me këngën “Unë dhe deti” që mori çmimin e publikut, Elmedina Vokshi – “Pranvera” si solistja më e re, Orges Morina – “Përvjet rritem” solisti më i ri dhe Lisa Latifi me këngën “Alla-alla portokalla” që mori çmimin “Reifeisen”.

Festivali është udhëhequr nga moderatori Fatmir Spahiu, i përkrahur edhe nga moderatoret e vogla Kaona Sylejmani, Anila Aliu dhe Elona Sadiku.
Edhe këtë vit Festivali i Këngës për Fëmijë “Lyra Fest” ka gjetur përkrahjen e zyrës së kryetarit të komunës së Gjilanit, Qemajl Mustafa./rajonipress/