Edhe Rrudhani kalon në LDK

Gjilan – Lidhja Demokratike e Dardanisë (LDD), tashmë zyrtarisht është forcë e shuar në Kuvendin e Kamenicës. As këshilltari i fundit i këtij subjekti, Besnik Rrudhani, nuk i ka qëndruar besnik LDD-së deri në përfundim të mandatit.

Kohë më parë LDD-në e braktisën, duke iu bashkuar grupit të këshilltarëve të LDK-së, Valbonë Keka dhe Burim Dërmaku. Besnik Rrudhani, një nga figurat e fundit kryesore të mbetur në LDD dha këto arsyetime për opinionin, për kalimin e tij në LDK.

“Është vullneti i elektoratit, arsyeja kryesore e bashkimit tim me LDK-në. LDK dhe LDD kanë qenë një brumë, kemi qenë së bashku në të kaluarën, janë të njohura arsyet e ndarjes dhe besoj se tashmë është koha e bashkimit të këtyre forcave”, tha Rrudhani në një prononcim për radion Premiera.

Ai ka konfirmuar se edhe katër anëtarë kryesisë së nëndegës së LDD-së në Roganë, që nga mbrëmë kanë kaluar në LDK. “LDD po shkon drejt shuarjes. Që nga përfundimi i zgjedhjeve, në këtë parti nuk ka pasur aktivitet, s’ka pasur mbledhje, nuk ka zyrë, çka do të thotë se ky subjekt ka marrë fund”, ka deklaruar Besnik Rrudhani.

Kohët e fundit ka pasur mjaft zhvillime sa i përket numrave në Kuvendin e Kamenicës. LDK-ja, është tashmë subjekti më i madh politik në këtë organ me 11 këshilltarë. PDK-ja është tkurrur për një këshilltar, ashtu sikurse AKR-ja, derisa AAK-ja me pesë këshilltarë, i ka shpëtuar këtyre lëvizjeve.

Besa Krasniqi dhe Ismail Sopi, në seancën e sotme të Kuvendit, janë ulur në bankën e LDK-së. Këta emra, ishte konfirmuar se do t’i bashkoheshin LDK-së, në përvjetorin e fundit të kësaj partie.

Kryetari i Komunës, Shaip Surdulli dhe shefi i grupit të këshilltarëve të LDK-së, Jeton Biçkaj, në mbledhjen e sotme të Kuvendit, iu kanë dëshiruar mirëseardhje anëtarëve të ri të partisë, derisa Bajram Dërmaku i PDK-së akuzoi ata se po e keqpërdorin organin më të lartë të komunës, duke u munduar ta shndërrojnë atë në një zyrë partiake./radiopremiera/rajonipress/