Edhe një titull “shkencor” nga VV , për Qemajl Mustafën

Gjilan – Qendra e Lëvizjes Vetëvendosje, në Gjilan përmes një aksioni simbolik para selisë së kreut të komunës së Gjilanit, e ka shpallur të hënën Qemajl Mustafën , “doctor causa nepotism”, duke e kritikuar atë për çështjen e punësimit.

Shkodran Ramadani, aktivist i Vetëvendosjes, ka thënë se sot në komunën e Gjilanit, kemi rastin ta shënojmë këtë ditë, ngase po e shpallim Qemajl Mustafën, “Doctor Causa Nepotism”.

“Ne po e shpallim me këtë titull ç’nderi, për punësimin pa konkurs dhe pa kualifikim të: bashkëshortes, në drejtorinë e Arsimit, vëllait, në zyrën për riatdhesim, kunatës, në shkollën fillore në Lagjen e Tetë (VIII), motrës, në konviktin e nxënësve dhe studentëve, dhëndrit, në shkollën fillore në Miresh”.

Ramadani tha se po i japin këtë mirënjohje me titullin më të lartë të korrupsionit, “Doctor Causa Nepotism”, për metodat e avancuara joligjore të punësimit si për punësimin përmes urdhrave me shkrim, për punësim përmes rekomandimet me shkrim, për punësim përmes SMS-ve, për të punësuarit “vullnetarë”, për të punësuarit në “listën e kryetarit”.

“Qendra e Lëvizjes Vetëvendosje në Gjilan pas protestës së fundit kundër nepotizmit, me propozime edhe nga qytetarë të komunës së Gjilanit, shpall sot kryetarin e komunës, “Doctor Causa Nepotism”, për favorizimin ekstrem të familjarëve të tij të ngushtë në institucionet publike dhe veçmas në arsim, duke e njoftuar kryetarin se për titullin e dhënë, kemi miratimin dhe bekimin e të gjithë të diplomuarve të komunës së Gjilanit, të cilët presin me vite të punësohen, por ja që nuk e kanë familjar kryetarin Mustafa dhe nuk mund të zënë një vend të punës në përputhje me orientimin e tyre universitar dhe profesional”, është shprehur Ramadani./rajonipress/