Edhe një bankë nga Turqia

Tregut të Kosovës do t’i shtohet edhe një bankë me kapital turk. Zyrtarët e Bankës Qendrore të Kosovës pranojnë se aplikacioni i një prej bankave të mëdha nga Turqia është në proces e sipër të shqyrtimit.

Kështu do të shkojë në tre numri i institucioneve financiare me kapital të biznesmenëve nga ky vend pas Bankës Kombëtare Tregtare dhe TEB Bankës, të cilat kontrollojnë rreth 7 për qind të tregut bankar në Kosovë.

Edhe një bankë me kapital turk shumë shpejt pritet t’i shtohet tregut të bankave në Kosovë. Kështu do të shkojë në tre numri i institucioneve financiare me kapital të biznesmenëve nga Turqia.

Për këtë çështje, të martën një grup bankierësh nga ky vend euroaziatik kanë mësyrë zyrat e Bankës Qendrore të Kosovës për t’u interesuar më detajisht se si të investojnë në këtë vend.

Mësohet se në takim me Guvernatorin Gani Gërguri ata kanë shprehur interesim për të zgjeruar veprimatinë e tyre edhe në Kosovë, pasi që vlerësojnë se ekziston stabilitet i mjaftueshëm financiar dhe disiplinë fiskale.

Zëdhënësi i BQK-së, Besnik Kada ka pranuar se tashmë kjo bankë i ka kryer procedurat e aplikimit për të operuar në Kosovë.

“ Aplikacioni i një banke nga Turqia është në proces e sipër të shqyrtimit. Për hir të respektimit të integritetit të procesit të licencimit emri i bankës bëhet publik vetëm me rastin e marrjes apo refuzimit të licencës. Mirëpo, me rëndësi është se fjala është për një nga bankat e mëdha nga Turqia”, ka pohuar Kada.(express)

Shpërndaje.
© RAJONIPRESS