Edhe në Nazeli ka shqiptarë

Nazeli (Turqi) – Nijazi Aykut është nga fshati Kicanlir që është në kuadër të regjionit Nazeli. Nijazi për rajonipress tregon historinë e familjes së tij dhe me emocione flet për Kosovën, Adem Jasharin e rrugët e Prishtinës të cilat i vizituar para një viti.

Në darkën e shtruar enkas për delegacionin e Gjilanit nga ana e kryetarit të Nazelisë merrnin pjesë personalitete të shumta të jetës institucionale, deputet, biznesmen, njerëz të kulturës etj.

Në këtë ndejë binte në sy buzëqeshja dhe gëzimi që e kishte përshkruar shqiptarin Nijazi Aykut. Ai në fillim dhe gjatë përshëndetjeve bëri me dije se është shqiptarë dhe se ka dëshirë të madhe të bisedojë me delegacionin e Gjilanit.

Nijazi Aykut ishte i ftuar special në këtë ndejë për shkak të ndikimit që kishte tek komuniteti shqiptarë në fshatin Kicanlir që është pjesë e qytetit Nazeli. “Unë jam shqiptarë dhe jam nga Kosova. Po më merr malli kur po ju shoh kështu bashkë e zemra po më rritet nga gëzimi” ishin fjalët e Nijaziut.

Ai për rajonipress ka shpalosur historinë e tij interesante.”Qysh në vitin 1912 familja ime është vendosur në këtë fshat që tani ka mbi 1500 shqiptarë. Ne jemi nga rrethi i Besisë së Prishtinës dhe jemi Sfarqali” tha Aykut.

Shqiptari nga Kicanlir flet shqip mirë dhe tha se kanë arritur që edhe në dasma e tradita dhe ndeja tjera tradicionale ta kultivojnë gjuhën shqipe.”Ne jemi pak më të vjetër dhe me fanatizëm po e ruajmë traditën. Vizitat e delegacioneve nga Kosova na shërojnë shpirtërisht dhe na japin emocione, kujtime e motiv për të vizituar më shpesh atdheun e të parëve tanë” u shpreh Aykut.

Me kënaqësi Aykut përkujton momentet e tija interesante gjatë vizitës së fundit që i ka bërë Kosovës.”Përmallohesha shumë kur vizitoja familjarët e mi atje. Më mbeti merak ta vizitojë kompleksin e Adem Jasharit, po kësmet edhe këtë ëndërr do ta realizojë”.

Aykut ka marrë një dhuratë nga Fadil Osmani menaxher në zyrën e projekteve në Gjilan i cili në shenjë respekti i dhurojë atij një stemë me flamurin shqiptarë./rajonipress/