E vret për vadë

Një problem tejet banal mes dy kushërinjve u bë shkas i një tragjedie të premten në fshatin Ranoc të Klinës. Gjergj Jakaj, 47 vjeçar, mbeti i vdekur në vend, duke mos u rezistuar plagëve që besohet se i mori nga djali i axhës, Ndue Jakaj, 51 vjeçar.

Gjithçka nisi për një vadë uji që po vinte nga mali i fshatit e që Ndue ia kishte hequr digën për ta lëshuar kështu kah dera e viktimës. Ishte ky ujë, që e vërshoi derën e viktimës, fill i zënkave që nisën mes këtyre kushërinjve për të përfunduar më pas në një tragjedi familjare.

Fillimisht dy kushërinjtë u zunë me fjalë, por situata u nxeh shumë kur Ndue Jakaj dyshohet se nxori alltinë dhe qëlloi disa herë djalin e axhës Gjergjin, për ta lënë të vdekur, pikërisht afër digës e cila shkaktoi gjithë këtë tragjedi. Familjarët nuk dinin asgjë. Shumica ishin në punë e disa të tjerë brenda shtëpisë. Menduan se Gjergji kishte shkuar në punë si gjithmonë, derisa një fqinj i tyre ua dha lajmin e hidhur se kishte gjetur trupin e viktimës të mbuluar në gjak e pa shenja jete.

Përveç anëtarëve të tjerë të familjes, i shokuar nga lajmi që mori mëngjesin e së premtes ishte Pjetër Jakaj, vëllai i viktimës Gjergj Jakaj. Ai ishte në orën e mësimit, duke u ligjëruar nxënësve kur dikush erdhi e i tha se vëllanë ia vrau djali i axhës, për të cilin thotë se deri të premten në orën 9 e kishte konsideruar si vëlla. “Akoma nuk po mund të besoj se situata ka arritur deri këtu. Që dikush e vret djalin e axhës, fqinjin dhe vëllanë e tij për shkak se i thotë ta mbyllë digën”, ka rrëfyer të premten Pjetri për Express.

Thotë se kurrë më parë ata nuk kishin pas probleme mes vete deri ditët e fundit kur në fshat nisi të binte shi. “E kemi rregulluar këtë farë pune njëherë. Kemi hap një kanal të ri të vadës. Edhe Ndue e ka mbyll atë të vjetrin me digë, pasi po na shkaktonte shumë telashe para derës…por krejt ranë poshtë të premten”, sqaron Pjetri i cili thotë se akoma nuk po mund ta marrë me mend faktin se vëllai i tij nuk jeton më. “Dhe kush ia morri jetën, njeriu i gjakut, i familjes të cilin e kemi konsideruar si vëlla”, thotë ai.

Megjithëse ky relacion mes dy shtëpive që ndodhen shumë pranë njëra-tjetrës ka përfunduar të premten me vrasjen e Gjergjit. “Arsyeja që ai ma vrau vllahun është e palogjikshme. Përveç që e mori një jetë njeriu, me këtë akt ai e njollosi edhe familjen Jakaj”, pohon Pjetri, vëllai i tashmë të ndjerit Gjergj Jakajt.

E pavarësisht dhimbjes që djali i axhës i shkaktoi atij dhe familjarëve të tjerë, Pjetri thotë se nuk e ka ndërmend të bëjë diçka të ngjashme që ai ia bëri mëngjesin e së premtes. “Ai i la katër fëmijë pa baba dhe një grua pa burrë. Me të le të merret drejtësia”. Kjo pavarësisht se pas tragjedisë asnjëri nga familja e dorasit nuk erdhi të paktën për t’i kërkuar falje apo për t’i ngushëlluar për atë çfarë u bëri vaki. “Akoma jemi të mpirë, po e presim trupin e vëllait që ndodhet në Prishtinë për obduksion. Do ta varrosim siç e ka merituar”.

Express është munduar të flasë edhe me familjarët e dorasit Ndue Jakaj, i cili dyshohet se ka vrarë 47 vjeçarin Gjergj Jakajn, njëherësh djalin e axhës. Por, dera e shtëpisë aty ishte e mbyllur për të gjithë. Pas tragjedisë që ndodhi mëngjesin e së premtes, fshatarët thonë se e gjithë familja e dorasit është ngujuar brenda mureve të shtëpisë. “Askush nuk po del nga dera, as që po lëvizin”, thonë ata.

Ky rast është konfirmuar edhe nga Policia e Kosovës, saktësisht nga Stacionin policor në Klinë. Sipas një komunikate për media nga kjo zyrë, thuhet se të premten rreth orës 09 e 10 minuta përmes telefonit është njoftuar për një rast të vrasjes në fshatin Ranoc, komuna e Klinës. “Njësitë reaguese të policisë dhe hetuesit kanë arritur në vend të ngjarjes dhe kanë arrestuar edhe personin e dyshuar , shtetasin N.J.(1961), të cilit i është konfiskuar edhe arma e zjarrit, për të cilën dyshohet se e ka përdorur në rast”, thuhet ndër të tjera në raport.

“Viktimë e kësaj vrasjeje është Gjergj J.(1961), të cilin e kishin dërguar të afërmit e tij në Qendrën e Mjekësisë Familjare në Klinë, dhe mjeku kujdestar ka konstatuar vdekjen e shkaktuar nga arma e zjarrit”, thuhet në raport. Sipas hetimeve preliminare, dyshohet se deri të incidenti kishte ardhur pas një konflikti verbal dhe fizik në mes të të dyshuarit dhe viktimës.

Vdekja e Gjergj Jakajt është konfirmuar edhe në QKMF “ Nënë Tereza” në Klinë. “ Personi Gj.Jaku ka ardhur pa shenja jete në QKMF, mjekët e kanë konstatuar vdekjen e tij të shkaktuar me armë zjarri. Ka qenë i goditur disa herë në pjesën e përparme”, ka konfirmuar drejtori i QKMF-së në Klinë, Ali Ahmetxhekaj.

Aktualisht njësitë përkatëse kanë bërë sigurimin e vendit të ngjarjes, përderisa në vendngjarje kanë arrit edhe hetuesit përkatës të Njësitit të Hetimeve Rajonale dhe nën mbikëqyrje të prokurorit të çështjes kanë filluar këqyrjen e vendit për të mbledhur prova dhe dëshmi rreth vrasjes. Trupi i pajetë i viktimës me vendim të prokurorit është dërguar për ekzaminim.