Ish kampioni i boksit, Mike Tyson ka pushtuar ringun, televizionin dhe filmin. Ajo çka i ka mbetur për ta provuar është Broadway.
E këtu ai do të debutojë të hënën e ardhshme, me shfaqjen “Mike Tyson: Undisputed Truth”, ose më saktë e vërteta e padiskutuar, e ish-kampionit të boksit, për peshat e rënda.
“Ishte një gjë që doja ta bëja prej kohësh, ndaj vendosa ta bëja pasi hoqa dorë nga drogat”, ka rrëfyer Tyson gjatë një konference për shtyp.
Spektakli, që ka arritur të ketë sukses në Las Vegas, hedh dritë mbi eksperiencat jetësore të Tyson: që nga marrja e titullit botëror për peshat e rënda, tek dënimi për përdhunim e deri në betejën e fundit me drogën. Në spektakël do të trajtohet edhe marrëdhënia e Tyson me tetë fëmijët e tij, që i ka pasur me 3 gra të ndryshme.
