Gjilan – Reshat Hyseni ish toger policie i suspenduar nga puna në qershor të vitit 2010 edhe pse i ka fituar të gjitha gjykimet dhe është liruar nga fajësia,rasti i tij është vendosur tek tani nga Gjykata Komunale e Ferizajit e cila ka vendosur në favor të kthimit të tij në punë.
Ish togeri i policisë së Kosovës Reshat Hyseni pas dy vitesh betejash e sfidash, e ka fituar një të drejtë që e ka kërkuar hiq më pak se dy vite. Gjykata Komunale e Ferizajit e kryesuar nga Fejzullah Rexhepi kryetar i trupit gjykues ka vendosur në favor të padisë së Hysenit,për kthim të menjëhershëm në vendin e tij të mëparshëm të punës.
Avokati mbrojtës Shemsedin Piraj tha për rajonipress se Gjykata e Ferizajit e ka aprovuar kërkesë padinë e Hysenit për kthim në vendin e tij të punës dhe e ka anuluar vendimin e Ministrisë së Punëve të Brendshme. Piraj tha se togeri Hyseni është kthyer në punë me të gjitha të drejtat e barabarta, duke mos e përjashtuar këtu në të ardhmen edhe kërkesën për dëmshpërblim.
Edhe, Reshat Hyseni tha se është dashur të pres dy vite për të marrë një vendim që kaherë e ka pritur.”I kam kaluar dhe kapërcyer të gjitha peripecitë. Unë gjithmonë kam deklaruar se isha viktimë e disa kolegëve të mi në Ferizaj dhe më vonë u vërtetua kjo. Por nuk mund t`i kuptojë vonesat dhe heshtjet e gjykatave” tha Hyseni.
Togeri Hyseni pret që shumë shpejt të kthehet në punë dhe t`i bashkëngjitet profesionit nga i cili ka marrë dhjetëra mirënjohje.
Ndryshe rasti i Reshat Hysenit kishte bërë bujë të madhe pasiqë Gjykata Supreme e Kosovës e kishte liruar nga paraburgimi me arsyetimin se ndaj tij kanë pushuar të gjitha arsyet ligjore.
Hyseni kishte deklaruar se vazhdimisht kishte dyshuar në kolegët e tij të stacionit në Ferizaj të cilët ishin të lidhur me njerëzit e krimit të organizuar. “Unë thjeshtë me punën time dhe përkushtimin që kam treguar ndaj dukurive negative isha pengesë serioze e njerëzve që merreshin me krimin e organizuar”.
Togeri Hyseni i kishte përjetuar shumë rëndë akuzat dhe montimet para dhe gjatë shqyrtimit kryesor në gjykimin e zhvilluar ndaj tij. “Është e vështirë për një intelektual me gradë togeri dhe me shumë mirënjohje e rezultate të arrestohesh në sallën e gjykimit. Ditën që jam liruar jam pritur në mënyrë spektakulare në fshat dhe shumica e kolegëve të mi më kanë vizituar dhe ky fakt më ka lehtësuar pak”.
Ndryshe, Reshat Hyseni ish komandant (u.d .) i stacionit policor në Ferizaj ishte dënuar me 8 vite e gjashtë muaj burgim,(25 maj 2009) nga Gjykata e Qarkut në Prishtinë nga trupi gjykues i kryesuar nga Fllanza Kadiu-gjyqtare. Hyseni nga fshati Ramjan i Vitisë ishte dënuar për veprat penale “dhunimi”, ”moslajmërimi i veprave penale” dhe “zbulimi i fshehtësisë zyrtare”.
Por pas shtjellimit të provave dhe pas rigjykimit Hyseni ka arritur të bindë trupin gjykues se procesi ndaj tij ishte i montuar.
Reshat Hyseni edhe në mbrojtjen e tij para trupit gjykues ka mohuar kryerjen e veprës penale . Në këtë proces gjyqësor është dënuar dhe shpallur fajtor edhe Blerim Ramadani nga Ferizaj me gjashtë vite burgim dhe Shpëtime Uka nga Shqipëria me 1 vit e gjashtë muaj burgim. /rajonipress/
