Dy raste të kontrabandës zbulohen në Ranillug, Dogana konfiskon mallra ushqimore dhe 340 litra birrë

Gjilan – Policia e Kosovës ka evidentuar dy raste të kontrabandimit me mallra në fshatin Kormnjan të Ranillugut, ku gjatë kontrolleve janë ndaluar automjete me targa të Serbisë dhe janë konfiskuar mallra pa dokumentacion përcjellës.

Sipas raportit policor, në rastin e parë është ndaluar një veturë që drejtohej nga një i dyshuar mashkull kosovar. Gjatë kontrollit janë gjetur dhe konfiskuar mallra ushqimore, të cilat dyshohet se ishin futur në mënyrë të kundërligjshme dhe pa dokumente përcjellëse.

Në një rast tjetër, në të njëjtin lokacion dhe në të njëjtën kohë, policia ka ndaluar një tjetër automjet me targa të Serbisë, ku janë gjetur dhe konfiskuar 340 litra birrë, gjithashtu pa dokumentacion përkatës dhe të dyshuara si mall kontrabandë.

Në të dy rastet, automjetet dhe mallrat janë dorëzuar në kompetencë të Doganës së Kosovës, ndërsa me vendim të prokurorit të dyshuarit janë liruar në procedurë të rregullt./rajonipress/