Dy ish-punonjës shqiptarë në Austri akuzohen për para në këmbim të vizave

Një hetim për dyshime për korrupsion në MA 35 të Vjenës, zyra përgjegjëse për çështjet e qëndrimit, emigracionit dhe shtetësisë, ka nxjerrë në pah mijëra mesazhe të shkëmbyera në aplikacionin Telegram, transmeton albinfo.ch.

Bisedat janë gjetur në telefonat e dy ish-punonjësve me prejardhje shqiptare dhe tashmë po shqyrtohen nga hetuesit. Sipas dyshimeve, komunikimet mund të tregojnë për raste kur procedura administrative janë përshpejtuar në këmbim të pagesave.

Një nga bisedat lidhet me një procedurë për vizë. Në komunikim përmendet një grua që “e dëshiron shumë” vizën, ndërsa përgjigjja është: “Mund t’i marrim 1 mijë”, në referencë të një pagese prej 1.000 eurosh.

Në një tjetër bisedë diskutohet për ndarjen e shumës në mënyrë të barabartë, 50 me 50. Më pas, në komunikim shfaqet edhe një mesazh ku thuhet: “Po i marr paratë sot, djali im i artë”.

Hetuesit dyshojnë se raste të tilla mund të kenë qenë pjesë e një praktike më të gjerë. Mesazhet e sekuestruara nuk lidhen vetëm me viza, leje qëndrimi apo shtetësi, por përmendin edhe çështje të tjera administrative dhe projekte ndërtimore.

Në disa prej komunikimeve përdoren shprehje që sugjerojnë përfitime financiare, ndërsa njëri prej mesazheve i referohet një projekti ndërtimi me fjalët se “edhe nga kjo fitojmë para”.

Hetimi ka çuar ndërkohë edhe në masa ndaj disa personave. Një drejtues departamenti është mbajtur përkohësisht në paraburgim nën dyshimin për pengim të hetimeve, ndërsa eprorja e tij ka humbur vendin e punës pas një kontrolli në banesë.

Sipas dyshimeve të ngritura nga autoritetet, njëri prej personave po hetohet për pranimin e përfitimeve të padrejta, ndërsa tjetri për keqpërdorim të autoritetit zyrtar dhe ryshfet.

Rasti ka ngritur pikëpyetje mbi mënyrën se si janë trajtuar disa procedura në MA 35. Autoritetet pritet të shqyrtojnë edhe dosjet e trajtuara më herët nga personat nën hetim, për të përcaktuar nëse ka pasur raste të tjera të ndikimit të paligjshëm apo përshpejtimit të procedurave kundrejt pagesave.

Hetimet janë ende në zhvillim dhe përgjegjësia penale e personave të përfshirë do të përcaktohet vetëm pas përfundimit të procedurave përkatëse./Albinfo.ch