Dy gola dhe asistim me Mallorcan, Muriqi paralajmëron një sezon të suksesshëm

Sulmuesi i Kosovës, Vedat Muriqi, e ka gjetur dy herë rrjetën në ndeshjen miqësore ndërmjet SV Ried II dhe Mallorcas.

Skuadra spanjolle e nëpërkëmbi ekipin kundërshtar duke triumfuar me rezultat 9-0, në kuadër të ndeshjeve përgatitore para sezonit të ri.

Plot katër gola u realizuan në fraksionin e parë të lojës përmes Manu Morlanes (3’), Abdon Prats (12’, 40’) dhe Amath Ndiaye (34’).

Në gjysmën e dytë, Mallorca e ndryshoi tërësisht formacionin dhe në fushë u inkuadrua Vedat Muriqi.

Me të filluar gjysma e dytë, i asistuar nga Toni Lato, sulmuesi i Kosovës e pati të lehtë të shënonte (47’).

Nuk vonoi dhe Muriqi e realizoi golin e dytë personal me kokë (53’). Kësaj radhe asistoi Pablo Maffeo, i cili e dhuroi harkimin.

Daniel Luna (59’), Josep Gaya (67’) dhe Javi Llabres (73’) ishin golashënuesit tjerë, ndërsa Muriqi ishte asistues në golin e nëntë. /Telegrafi/