Duka “ndërron mendje” për shqiptarët e Zvicrës

Prishtinë – Presidenti i Federatës Shqiptare të Futbollit (FSHF), Armand Duka, ka ndryshuar deklaratat lidhur me futbollistët shqiptarë të Përfaqësueses së Zvicrës. Para ndeshjes mes Zvicrës e Shqipërisë, të zhvilluar të martën, Duka kishte ofenduar shqiptarët e Zvicrës, ndërsa pas ndeshjes ka thënë se ishin superprofesionistë.

Për Zvicrën në ndeshje kundër Shqipërisë startuan Valon Behrami, Xherdan Shaqiri e Granit Xhaka. Në pjesën e dytë luajtën edhe Blerim Xhemaili e Admir Mehmedi. Zvicra fitoi 2:0 ndeshjen e luajtur në Luzern. Golin e parë në stadiumin e dominuar nga tifozët shqiptarë e shënoi Xherdan Shaqiri. Shaqiri, Xhaka e më së shumti Behrami janë fyer e fishkëllyer vazhdimisht nga tifozët shqiptarë në stadium. Është vlerësuar se edhe deklarata e Dukës ka ndikuar që të krijohet atmosferë e tensionuar para dhe gjatë ndeshjes.

“Ata ishin super profesionistë dhe nuk kishin asnjë lidhje për të rënë pre e një presioni të mundshëm psikologjik. Në fund të fundit ata kanë bërë një zgjedhje dhe do të respektojnë edhe skuadrën që kanë zgjedhur. Ky është një diskutim për mua i mbyllur me kohë. Në njëfarë mënyrë loja të martën e tregoi këtë”, ka thënë Duka të enjten (më gjerësisht sot në “Koha Ditore”).