Donis Avdijaj me rekorde si Mulleri

Një yll i ri po vjen. Sulmuesi i spikatur dhe i pagabueshëm para portave kundërshtare. Talenti kosovar, Donis Avdijaj, po mahnit futbollin gjerman me golat e shumtë që ka shënuar këtë stinor në Ligën e të Rinjve në Gjermani.

Si Avdijaj, ashtu edhe skuadra e tij, Schalke 04 Junior, po gëzon një formë të jashtëzakonshme, duke pushtuar mediumet gjermane. Kjo skuadër ka shënuar 14 fitore nga po aq ndeshje, duke i mposhtur me lehtësi kundërshtarët e tyre. Madje, ata kanë një goldallim impresiv, me 73 gola të shënuar dhe vetëm 10 të pësuar. E njëri nga futbollistët më meritorë për këta gola të shënuar, sigurisht se është kosovari Avdijaj. Ai ka shënuar më shumë se 30 % të golave të skuadrës, apo 23 prej tyre.

Avdijaj u transferua te Schalke 04 nga Osnabruck në vitin 2011, ndërsa në gjysmëstinorin e parë që luajti me këtë skuadër, shënoi 26 gola. Madje, këtë stinor Avdijaj ka qenë më i saktë në goditjet e tij sesa nëntë prej 14 skuadrave që garojnë në këtë ligë. Vetëm në ndeshjen e parë të këtij stinori ai nuk arriti të shënojë gol, pasi në të gjitha tjerat e bëri një gjë të tillë. Në nëntë ndeshje me radhë ai ka shënuar të paktën nga dy gola për ndeshje. Duke llogaritur 14 ndeshjet e zhvilluara dhe 23 golat e shënuar, del se sulmuesi 16-vjeçar kosovar shënon gati dy gola për çdo ndeshje.

Fenomen si Mulleri

E golat e shumtë të shënuar me skuadrën e re të Schalkes, kanë bërë që mediat gjermane ta etiketojnë Avdijajn si pasardhës të denjë të legjendës së tyre, Gerd Muller. Ky i fundit njihet për efikasitetin e tij të lartë para portave kundërshtare dhe ishte vetëm Lionel Messi gjatë vitit të kaluar që theu rekordin e tij për më së shumti gola të shënuar për një vit kalendarik.

E për Avdijajn, tashmë interesimi i top-klubeve evropiane është i madh. Liverpooli ishte e skuadra fundit që bëri përpjekje të nënshkruante me të, mirëpo ende asgjë konkrete. Inter, Bayern Munich, Arsenal e Juventus janë të interesuar për shërbimet e sueprtalentit kosovar. (ORAinfo)