Donacion i vlefshëm për QKMF-në në Viti: Forcohen shërbimet e urgjencës primare

Viti – Qendra Kryesore e Mjekësisë Familjare në Viti ka pranuar sot një donacion të rëndësishëm në funksion të përmirësimit të shërbimeve të urgjencës primare, falë bashkëpunimit me Shoqata Zentrum Parandalo dhe Xhamia Shtëpia e Paqes në Cyrih të Zvicrës.

Ky donacion pritet të ndikojë drejtpërdrejt në rritjen e cilësisë së trajtimit të pacientëve, duke lehtësuar punën profesionale të stafit shëndetësor dhe duke garantuar kujdes më efikas e të sigurt, veçanërisht në rastet e traumave dhe aksidenteve.

Në kuadër të këtij kontributi janë dhuruar 20 bartëse për pacientë të lënduar, të cilat do të shfrytëzohen në shërbimin e urgjencës primare, në Qendrën e Mjekësisë Familjare në Pozheran si dhe në autoambulancat e komunës.

Drejtoresha e QKMF-së, Vjollca Kadolli Halili, shprehu mirënjohje të thellë për donatorët, duke theksuar rëndësinë e këtij mbështetjeje në avancimin e shërbimeve shëndetësore në Komunën e Vitisë. Me këtë rast, në emër të institucioneve komunale, ajo ndau mirënjohje për përfaqësuesit e donatorëve si shenjë falënderimi.

Vlen të theksohet se bashkëpunimi ndërmjet QKMF-së në Viti dhe Shoqatës “Parandalo” ka qenë i vazhdueshëm edhe më herët, përmes aktiviteteve vetëdijësuese në komunitet, duke dëshmuar një partneritet të qëndrueshëm në shërbim të shëndetit publik./rajonipress/