Do t`i shënoja Shqipërisë

Ardian Gashi thotë se do t’i shënojë gol Shqipërisë, nëse i jepet mundësia, në kualifikimet për Botërorin 2014. Futbollisti kosovar ndihet i lumtur që u rikthye në përfaqësuesen skandinave dhe shpreson që me paraqitje pozitive të ketë jetë të gjatë te ekipi i Egil Olsenit. 31 vjeçari insiston se është përmirësuar mjaft, që kur u transferua në futbollin suedez.

Ardian Gashi është rikthyer në përfaqësuesen e Norvegjisë pas shtatë vjetësh. Mesfushori kosovar i shijoi disa minuta në ndeshje me Qipron të martën mbrëma në kuadër të kualifikimeve për botërorin ‘Brazili 2014’.

Futbollisti ofanziv shpreson të ftohet edhe në ndeshjet e radhës dhe premton se po t’i jepet rasti, do të shënonte gol ndaj Shqipërisë, edhe pse vetë është shqiptar.

“Unë jam i lidhur ngushtë me Shqipërinë, por kjo është e tëra. Është një luftë për tri pikë dhe luaj për Norvegjinë. Dhe nëse më vjen mundësia të shënoj gol, do ta bëj”, ka thënë futbollisti i Helsingborgut për ueb faqen norvegjeze vg.no.

31 vjeçari thotë se është pjekur si lojtar në krahasim me vitin 2005, kur ishte ftuar ta përfaqësonte vendin skandinav. Që kur e la Fredrikstadin tri vjet më parë, ai ka përparuar dhe po shkëlqen në futbollin suedez. “Tash jam më i pjekur, pasi kam bërë përvojë në Suedi. Kam pasur ngritje dhe zbritje në karrierë, për këtë ndoshta nuk më kanë marrë në konsideratë”, vijoi ai.

Futbollisti gjakovar e pranon se nuk kishte pritur që do të ftohej më për këtë ekip, por pasi ftesa arriti nga selektori Egil Roger Olsen, ai synon ta ruajë vendin e tij për një periudhë afatgjate.

“Unë nuk e kisha ruajtur numrin e selektorit, ai më thirri dhe nuk u përgjigja në telefon. Por, kur e mora mesazhin, e thirra. Ishte ndjenjë e mirë kur e kuptova lajmin. Gjithmonë kam jetuar me shpresa, por ta them të drejtën nuk e prisja ftesën. Shpresoj ta kem rastin dhe të bëj paraqitje të mira për një kohë të gjatë”, tha më tej Gashi.

Gashi e mbron Xhakën

Ardian Gashi e ka mbrojtur Granit Xhakën, i cili u akuzua se nuk kishte shënuar gol me qëllim ndaj Kombëtares shqiptare në fitoren e muajit të kaluar të Zvicrës. “Ai e ndali topin keq. E kam parë situatën dhe kam biseduar me njerëz që e njohin dhe ata thonë se në ato momente nuk ka qenë i koncentruar sa duhet dhe e ka lëshuar atë rast. Natyrisht, po të mundte, do të shënonte, por ishte ndalje e gabuar e topit, kështu që duket paksa qesharak ai rast”, thotë Gashi.

Gashi: Kosova ka stagnuar

Ardian Gashi është lindur në Kosovë dhe ka shkuar me familje në Norvegji kur ishte 8 vjeç. Ai e ka përfaqësuar vendlindjen e tij në disa ndeshje, por pasi Kosova nuk ka mundur të pranohet në UEFA e FIFA, Gashi e pranoi ftesën e Norvegjisë.

“Hera e parë që kam luajtur për Kosovën ishte viti 2005 ose 2006, por kam luajtur atje vetëm një herë në vitet e fundit. Atje është bërë përparim i vogël, por shpresoj që t’i menaxhojnë gjërat si duhet dhe të arrijnë diçka. Momentalisht, Kosova nuk mund të luajë ndeshje zyrtare e as të organizojë miqësore. Njerëzit atje kanë nevojë të shohin diçka pozitive në jetën e përditshme”, përfundoi Gashi.