Diskriminimi sistematik i Krahinës Shqiptare të Luginës së Preshevës
RajoniPress
18:58, 21 Janar, 2013
Bujanoc -Para disa ditësh ishim dëshmitarë të ngjarjeve të fundit, që u zhvilluan në Krahinën Shqiptare, në Luginë të Preshevës në përgjithësi, e në qytetin e Preshevës në veçanti.
Lapidari i UÇPMB-së i vendosur para objektit të Komunës në Preshevë, ishte caku i tërë ngjarjeve që pasuan më pas deri në heqjen e Tij të dhunshme nga ana e xhandarmërisë serbe.
Heqja me dhunë e lapidarit nga ana e policisë serbe dhe qëndrimi tanimë i njohur i Daçiqit, dëshmojnë edhe njëherë se sa shumë është antishqiptare pushteti dhe shteti i Serbisë.
LPD dënon aktin e heqjes me dhunë të lapidarit dhe kërkon nga shqiptarët të mos provokohen e të mos bien pre e akteve qyqare të cilat e karakterizuan shtetin dhe xhandarmerinë serbe në ditën e intervenimit të 20 Janarit 2013.
Serbia e hoqi fizikisht lapidarin nga vendi i tij në Preshevë, por e ngriti nga një lapidar të UÇPMB-së në zemrën e çdo shqiptari kudo nëpër botë;
LPD kërkon unitet kombëtar, qytetar e politik të popullit të Krahinës shqiptare të Luginës së Preshevës dhe paralajmëron Serbinë dhe politikën e politikanët antishqiptar aktual në pushtet, që të kenë kujdes me këtë Krahinë shqiptare, se nuk dorëzohemi dhe se patjetër do t’i gëzojmë të drejtat tona, që na garantohen me norma e konventa ndërkombëtare;
LPD kërkon nga Shqipëria, Kosova dhe faktori politik shqiptar në Maqedoni që të jenë më aktiv në mbrojtje të Krahinës shqiptare, Luginës së Preshevës nën Serbi;
LPD kërkon nga faktori ndërkombëtar e në veçanti nga SHBA-të, Britania e Madhe, Gjermania, Franca, Italia etj., që të jenë garantuese të proceseve demokratike në Krahinën Shqiptare të Luginës së Preshevës, sepse Serbia është e njohur që nuk respekton marrëveshjet e arritura;
LPD kërkon nga mekanizmat euroatlantike, që të mos lejojnë hyrjen e Serbisë në mekanizmat relevantë e veçanërisht në BE, derisa ajo nuk garanton sjellje demokratike e qytetare ndaj Krahinës Shqiptare të Luginës së Preshevës.
Ne shqiptarët jemi autokton në Krahinën Shqiptare të Luginës së Preshevës. Kjo është toka jonë. Ne Atdhe tjetër nuk kemi. Këtu i kemi varret e të parëve tanë, këtu kemi derdhur gjakun e luftës për të drejta e barazi kombëtare, në uniformën e shentjë të emblemës së UÇPMB-së dhe këtu do të jemi përgjithmonë thuhet në njoftimin e LPD-së./rajonipress/
