Diplomohet në moshën 97-vjeçare

Një 97-vjeçar australian ka vendosur një tjetër rekord botëror, duke fuqizuar fjalën e urtë “për të mësuar nuk është kurrë vonë”, pasi ka arritur të marrë një master në shkenca klinike, pranë universitetit Southern Cross në Lismor.

Allan Stewart ka mundur rekordin e thyer më parë nga vetë ai, kur u bë i diplomuari më i moshuar në botë në vitin 2006, kur hyri në Guinnes pasi siguroi diplomën në juridik.

Stewart nuk është një figurë e re në ambientin universitar, duke qenë se ka marrë diplomën e parë në kirurgji dentare në Universitetin e Sidnejit në vitin 1936.

Pas një karriere të gjatë si dentist ai iu rikthye studimeve në fakultetin juridik, duke përfunduar 4 vjet e gjysmë kurs në gjashtë vjet, nga frika se nuk kishte kohë të mjaftueshme për të jetuar, dhe duke marrë diplomën në moshën 91-vjeçare.

Diploma e sotme është e katërta e tij. Udhëheqësja e tij, profesorja Sonia Borwnie, ka treguar se kur kishte parë në kërkesën e tij datën e lindjes, në vitin 1915, ishte drejtuar për në sekretari për të denoncuar një gabim, por ishte vetë ajo që gabohej.

“Doktor Stewart ka studiuar për më tepër me korrespondencë dhe ka treguar aftësi të shkëlqyera në menaxhimin e kohës”, ka thënë profesorja Brownie.