Diplomaci me pesë mijë euro

Viti 2014 pritet të jetë i zbehtë në aspektin e diplomacisë parlamentare dhe me gjasë kryetari i Komisionit për Punë të Jashtme, Albin Kurti, as këtë vit nuk do të lëvizë shumë jashtë vendit. Komisioni që ai e udhëheq është i kufizuar për të ushtruar veprimtarinë e tij për shkak të mungesës së buxhetit. Në takimin e së premtes kur ky organ ka diskutuar planprogramin për sivjet, është nxjerrë përfundimi se misioni nuk mund të përmbushet kur je i hendikepuar. E hendikepi, sipas tyre, vjen nga buxheti, për faktin se atyre nuk i janë ndarë më shumë se 5 mijë euro për t’i kryer detyrat e përcaktuara me program

Anëtarët e komisionit janë ankuar se me këtë shumë gjatë një viti mund të kryhen vetëm punët administrative dhe të paguhen kafet e takimeve. Kryetari Albin Kurti e ka përshkruar këtë situatë si alarmante pasi, sipas tij, deputetët gjithnjë po varen nga mëshira e shteteve të huaja të cilët i ftojnë dhe ua paguajnë shpenzimet e qëndrimit dhe udhëtimit. “Nuk po mund të zhvillosh politikë aktive. Në njëfarë mënyre ne jemi nën mëshirën e ftesave që na vijnë e që s’na vijnë. Pra edhe aty jemi nën mëshirën e atyre që paguajnë shpenzimet për udhëtime dhe qëndrimet e deputetëve tanë në vizita”, ka thënë Kurti. Për këtë, ai ia ka hedhur fajin Qeverisë e cila, sipas tij, ka hartuar buxhetin sipas të cilit është përkujdesur që Zyra e kryeministrit të ketë më shumë para sesa tërë Kuvendi me 120 deputetë….(Tribuna)