Ministri i Diasporës, Ibrahim Makolli, tha për albinfo.ch se e njëjta taksë aplikohet edhe nëpër vendet e tjera të Bashkimit Evropian
Mirëpo për të dhënë një vlerësim të saktë rreth asaj se a është e rënduar diaspora edhe me një taksë shtesë, sipas Makollit, duhet pritur që ligji të miratohet në leximin e dytë.
“Propozimi për vendosjen e taksës ekologjike nga Ministria e Financave kaloi si lexim i parë në Kuvendin e Kosovës. Duhet pritur vendimin përfundimtar të deputetëve të parlamentit dhe pastaj të japim vlerësime rreth kësaj çështje”, tha ministri Makolli.
Pavarësisht se çka do të vendosë Parlamenti, sipas tij, taksat ekologjike, ose ndryshe siç quhen në disa vende “taksa e gjelbër”, do të duhej të aplikohej edhe në Kosovë, për shkak të obligimeve, siç tha Makolli, që Republika e Kosovës ka ndaj normave dhe standardeve ndërkombëtare në aspektin ekologjik.
“Duke pasur parasysh që institucionet e Republikës së Kosovës, shoqëria kosovare në përgjithësi, synojnë integrimin në Bashkimin Evropian, atëherë edhe ne ashtu si të gjitha vendet e tjera duhet plotësuar disa kushte dhe standarde që janë të përshtatura me politikat evropiane”, u shpreh Makolli.
Në të gjitha vendet e Bashkimit Evropian dhe ato që janë në procesin e integrimit, siç tha ai, taksat ekologjike tashmë janë politika që aplikohen me vite.
Ndryshe, një javë më parë, Kuvendi i Kosovës miratoi në parim Projektligjin për taksën ekologjike, me të cilën mërgimtarët që posedojnë makina nën masën 3.5 tonë, gjatë hyrjes në Kosovë obligohen të paguajnë taksën e gjelbër në vlerë prej 10 eurosh, ndërsa për makinat që kalojnë këtë vlerë do të paguajnë 30€ në vit.
