Derbi romak për Abrashin
Derbi romak vazhdon edhe në ‘mercato’. Në fakt, Roma dhe Lazio janë futur në një betejë për ta transferuar futbollistin shqiptar, Amir Abrashi.
Siç shkruajnë mediat italiane, në fakt klubi Biancocelesti është hedhur përsëri në sulm për mesfushorin shqiptar të datëlindjes 1990, që luan për nënkampionët e Zvicrës, Grasshopers.
Për më tepër, lojtari vlerësohet shumë nga drejtori sportiv Igli Tare që e ndjek prej disa kohësh talentin shqiptar.
Mund të hapet në këtë mënyrë një derbi merkatoje me Romën, e cila është e interesuar gjithashtu për lojtarin dhe ka mbledhur informacione, por duhet të shikohen me kujdes edhe Torino me Sassuolon, edhe ata shumë të interesuar për Abrashin.
Siç kuptohet qartë e ardhmja e mesfushorit të Shqipërisë që është grumbulluar nga De Biazi në dy ndeshjet e fundit, do të jetë Serie A, ku shumë skuadra prestigjioze kërkojnë talentin kuqezi.