Deputetët liderëve: Aman, na ndihmoni

Për të zgjidhur ngërçin e krijuar në Kuvendin e Kosovës është e domosdoshme ndërhyrja e liderëve politik. Liderë të partive më të mëdha politike në vend ka gjasë që të bëhen bashkë në një takim, ku do të diskutojnë mundësinë se si të zhbllokojnë punën e institucionit më të lartë ligjvënës në vend.

Përveç deputetit të PDK-së, Arsim Bajrami, dhe nënkryetarit të Kuvendit po nga PDK-ja, Xhavit Haliti, të cilët kërkuan ndihmën e liderëve politikë në këtë rast, edhe shoqëria civile po e kërkon një gjë të tillë, transmeton KTV.

Instituti Demokratik i Kosovës, i cili monitoron vazhdimisht punën e Kuvendit, thotë se ndihma e liderëve politikë në këtë situatë, është e domosdoshme. Driton Selmanaj thotë se nëse kjo situatë vazhdon, atëherë shpie drejt zgjedhjeve të parakohshme. AAK-ja, e cila thotë se e do zhbllokimin e punës së Kuvendit, po kërkon një marrëveshje ndërmjet shefave të grupeve parlamentare.

Por, LDK-ja shprehet e palëkundur nga qëndrimet e saj. Edhe për Vetëvendosjen, sipas së cilës procesi i privatizimit të PTK-së është udhëhequr deri tash në kundërshtim me Ligjin për Ndërmarrjet Publike, thotë se çfarëdo takimi e çfarëdo vendimi i liderëve, nuk mund ta zhbëjë, e as ta prapakthejë këtë të vërtetë. Në lëvizjen e Kurtit insistojnë që Komisioni për hetimin e PTK-së duhet të plotësohet, meqë është nënshkruar nga 40 deputetë.