Deponitë ilegale alarmojnë qytetarët e Vitisë, kërkohen masa urgjente nga institucionet

Viti – Shtimi i deponive ilegale të mbeturinave në territorin e Komunës së Vitisë po vazhdon të mbetet një ndër shqetësimet kryesore për qytetarët, duke paraqitur rrezik serioz për shëndetin publik dhe mjedisin. Sipas vlerësimeve të përfaqësuesve të EVSB-së, gjendja është veçanërisht e rënduar në hyrje të fshatit Pozheran, në lagjen e muhaxherëve, ku në të dy anët e rrugës janë evidentuar grumbuj të mëdhenj mbeturinash të llojeve dhe përmasave të ndryshme.

Këto deponi, të krijuara jashtë çdo kontrolli institucional, po ndikojnë drejtpërdrejt në ndotjen e ajrit, ujit dhe tokës. Djegia e mbeturinave, përfshirë gomat, si dhe hedhja e tyre pranë burimeve ujore, konsiderohet ndër rreziqet më të mëdha për shëndetin e qytetarëve dhe për ekosistemin lokal.

Pavarësisht aksioneve të vazhdueshme për pastrim nga Komuna e Vitisë, fenomeni i deponive ilegale vazhdon të përsëritet. Në mbledhjen e fundit të Këshillit Komunal për Siguri në Bashkësi (KKSB), të mbajtur më 2 prill 2026, autoritetet lokale kanë paralajmëruar masa më të rrepta për ndalimin e hedhjes së pakontrolluar të mbeturinave.

Nga ana tjetër, përfaqësues të EVSB-së theksojnë se përveç veprimeve institucionale, është i domosdoshëm edhe rritja e përgjegjësisë qytetare. Hedhja e mbeturinave jashtë hapësirave të dedikuara dhe krijimi i deponive ilegale mbetet një problem i vazhdueshëm që kërkon ndërgjegjësim më të madh nga komuniteti thuhet në reagimin e Imri Emërllahut.

Qytetarët e Vitisë kërkojnë zgjidhje afatgjata, monitorim më të rreptë dhe ndëshkime konkrete për ndotësit, në mënyrë që të mbrohet mjedisi dhe cilësia e jetës në këtë komunë./rajonipress/