Deponia ilegale në hyrje të Uglarit vazhdon të rrezikojë mjedisin dhe shëndetin publik

Gjilan – Një deponi ilegale mbeturinash në hyrje të fshatit Uglar vazhdon të mbetet problem serioz për banorët dhe mjedisin, pavarësisht afërsisë me Deponinë Regjionale të Mbeturinave që operohet nga Kompania për Menaxhimin e Deponive në Kosovë. Kjo situatë po konsiderohet paradoksale dhe shqetësuese, duke ngritur pikëpyetje mbi menaxhimin e mbeturinave në këtë zonë ka shkruar Bashkim Isufi.

Sipas banorëve dhe vëzhgimeve në terren, grumbullimi i mbeturinave në këtë hapësirë përbën rrezik të drejtpërdrejtë për shëndetin publik dhe ndotje të konsiderueshme të mjedisit, veçanërisht për qytetarët që frekuentojnë këtë rrugë hyrëse.

Ndërkohë, Komuna e Gjilanit më 3 mars 2023 ka miratuar Planin Komunal për Menaxhimin e Mbeturinave 2023–2027, i cili parashikon masa konkrete dhe buxhet të dedikuar për eliminimin e deponive ilegale. Sipas këtij plani, për këtë qëllim janë ndarë mjete financiare në vazhdimësi për çdo vit, përfshirë edhe 15,000 euro për vitin 2026.

Megjithatë, pavarësisht ekzistencës së këtij plani dhe detyrimeve ligjore që rrjedhin nga Ligji për Menaxhimin e Mbeturinave, deponia në hyrje të Uglarit vazhdon të qëndrojë e paprekur prej vitesh, pa ndërhyrje konkrete nga institucionet përgjegjëse.

Sipas të dhënave buxhetore, Komuna e Gjilanit ka miratuar për vitin 2026 një buxhet prej rreth 41.9 milionë euro, ku mbi 5.3 milionë euro janë ndarë për Drejtorinë për Shërbime Publike, Infrastrukturë dhe Banim. Brenda këtij buxheti, janë paraparë mjete që do të duhej të mbulonin edhe eliminimin e deponive ilegale, përfshirë këtë rast.

Qytetarët dhe njohësit e çështjeve mjedisore kërkojnë nga autoritetet komunale që të ndërmarrin masa urgjente për pastrimin e zonës dhe zbatimin e plotë të planit komunal, në mënyrë që të parandalohet përkeqësimi i mëtejshëm i situatës dhe të mbrohet shëndeti i banorëve ka thënë Bashkim Isufi./rajonipress/