Demarkacioni në Kuvend, ‘kile’ e Mustafës për Veselin

Zhvillimet e djeshme politike në vend e kanë “detyruar” kryeministrin Isa Mustafa që të ngutet sa i përket çështjes së demarkacionit. Ai, nga Anglia – ku po qëndron për vizitë zyrtare – ka dërguar dje një komunikatë për medie në të cilën ka lajmëruar se të hënën do të dërgohet në Kuvend marrëveshja për demarkacionin me Malin e Zi.

Në një prononcim për KALLXO.com, analisti Imer Mushkolaj tha se zhvillimet e fundit politike po dëshmojnë një “luftë” mes Mustafës dhe kreut të PDK-së, Kadri Veseli.

“Mustafa, me procedimin e demarkacionin në Kuvend, po do me e qit para aktit të kryer Veselin me idenë se ky i fundit nuk po dëshiron me e kry – me e kalu demarkacionin – dhe me e bë përgjegjës për mos liberalizim të vizave”, tha Mushkolaj për KALLXO.com.

Ndërsa, analisti tjetër, Belul Beqaj, zgjedhjet i sheh të pashmangshme – kaloi apo nuk kaloi demarkacioni. Sipas tij 61 vota do të bëhen dhe mocioni i mosbesimit ndaj Qeverisë do të ketë sukses. Ndërkaq, vendimin për ta dërguar në Kuvend marrëveshjen e demarkacionit, ai e sheh si tentim për t’ia lënë një “kile” PDK-së.

Partitë opozitare gjatë ditës së djeshme dorëzuan në Kuvend nismën për mocionin e mosbesimit ndaj qeverisë. Një nismë e tillë ishte votuar edhe prej katër deputetëve të pozitës që janë pjesë e grupit parlamentar të PDK-së.