Delegacioni i Kosovës të ketë kujdes nga dinakëritë e Serbisë

“Bash nëse Beogradi insiston dhe ngul këmbë me kërkesat e tyre maksimale në veri edhe Prishtina duhet të dalë me kërkesat e veta, për vëllezërit tanë në Luginën e Preshevës,” ka thënë për agjencinë e lajmeve “Presheva jonë”, Adem Demaçi.

Veprimtari i çështjes kombëtare, Adem Demaçi rreth bisedimeve të djeshme maratonike të Brukselit mes Thaçit dhe Daçiqit nuk u tregua aq optimist, por as pesimist.

Pyetjes se a u mbajt mirë kryeministri Hashim Thaçi në raundin e tetë të mbrëmshëm, ku pritej një marrëveshje mes Beogradit dhe Prishtinës, Demaçi për agjencinë e lajmeve “Presheva jonë” është përgjigjur: “Thaçi mirë u mbajt, s’është keq, megjithëse bisedimet vazhdojnë dhe do të arrihet një marrëveshje. Unë kam drojën se përkëdheljet e Evropës ndaj Beogradit, nuk janë shenja të mira për vendin tonë”.

Me kërkesat e serbëve dhe përkëdheljet e Brukselit ndaj Beogradit me dialogun, sipas Demaçit, Kosovës nuk po i këndohet kajka e mirë.

“Beogradi në Bruksel po kërkon bashkimin e komunave serbe në veri, po kërkon gjyqësinë, policinë, po kërkon madje që ushtria e Kosovës të mos shkel në atë territorin tonin… dhe tash nuk di çfarë po mbetet për të mos hyrë atje? Kësaj ndryshe nuk i thonë, pos autonomi, që nesër i hap dyert për çfarëdo hapi, deri në shkëputje”.

Prandaj sipas Adem Demaçit, megjithëse topi tash gjenden në anën e Beogradit, delegacioni i Kosovës duhet të jenë syçelë, vigjilent dhe të ketë kujdes me dinakëritë e Serbisë e cila po insiston të rregulloj rendin dhe ligjin në shtetin tonë, me kërkesat e tyre në veri të Kosovës.

“Bash nëse Beogradi insiston dhe ngul këmbë me kërkesat e tyre maksimale në veri, edhe Prishtina duhet të dalë me kërkesat e veta, për vëllezërit tanë në Luginën e Preshevës”, ka thënë në fund Demaçi.