Deda: Marrëveshja e Brukselit e ka ndarë Kosovën

Çmimin Nobel për paqe, para 20 vjetësh, e kanë fituar edhe Jaser Arafat dhe Jicak Rabin për marrëveshjen e arritur në Oslo. Mirëpo, konflikti në mes të palestinezëve dhe izraelitëve ende vazhdon.

Në këtë mënyrë, Ilir Deda, drejtor i Institutit Kosovar për kërkime dhe zhvillime të politikave, KIPRED, në një intervistë dhënë të përditshmes serbe “Blic”, ka komentuar njoftimet se kryeministri i Kosovës, Hashim Thaçi dhe ai i Serbisë, Ivica Daçiq, ka mundësi ta fitojnë çmimin Nobel për paqe këtë vit.

“Rezultati i bashkëpunimit Daçiq- Thaçi ka krijuar këto rrethana: ata po bëjnë përpjekje që ta zgjasin qëndrimin e tyre në pushtet, ndërkaq BE dhe SHBA dëshirojnë ta përmbyllin këtë tregim. Por, sikurse të gjitha marrëveshjet e deritanishme në Ballkanin perëndimor, edhe kjo nga Brukseli është afatshkurtër dhe gjysmake. Plani i Ahtisarit ka inkurajuar ndërtimin e Kosovës si shtet qytetar, ndërkaq marrëveshja e Brukselit e ka ndarë Kosovën në pjesën serbe dhe atë shqiptare. E, për t’u arritur paqja, është futur edhe ndarja e sovranitetit”, ka vlerësuar Deda, transmeton koha.