Daut Xhemajli kandidat i vetëm për kryetar të PDK-së në Viti

Gjilan – Nëndegët e degës së PDK-së në komunën e Vitisë kanë përfunduar plotësisht dhe suksesshëm procesin zgjedhor, dhe mbajtjen e kuvendeve zgjedhore, thuhet në një njoftim të kësaj dege, krahu i Daut Xhemajlit, kryetar aktual i PDK në Viti.

Në një njoftim të PDK-së në Viti të nënshkruar nga Xhevat Bislimi thuhet se “Kryesia e Degës po bën përgatitje intensive për organizimin dhe mbajtjen e Kuvendit të Degës në fund të javës. Në pajtim me vendimin e Kryesisë, Nexhmedin Arifit nuk i është pranuar lutja për t’u rikthyer në PDK dhe për të marrë pjesë në Kuvendin e Degës”.

Kusht për t’u rikthyer Nexhmedin Arifi në PDK, kryetar aktual i Kuvendit Komunal të Vitisë, sipas njoftimit, është rikthimi i PDK-së në qeverisjen komunale.

“Kusht për t’u rikthyer Nexhmedin Arifi në PDK dhe për të marrë pjesë në Kuvend është rikthimi i PDK-së në qeverisjen komunale (shkarkimi i nënkryetarit, drejtorëve… dhe riemërimi i tyre nga radhët e PDK-së dhe nga partitë me të cilat do të bëhet koalicioni…).

Kandidat i vetëm për Kryetar Dege është Kryetari i tashëm i Degës, Daut Xhemajli, i cili ka paraqitur kandidaturën e tij konform rregullores”, përfundon njoftimi./rajonipress/