Daka: KQZ (s’)është e gatshme për zgjedhjet parlamentare!

Dy deklarata të ndryshme janë thënë nga kryetarja e KQZ-së, Valdete Daka, brenda dy dite. Ajo dje kishte thënë se Komisioni Qendror i Zgjedhjeve zotohet që pavarësisht sfidave që mund t’i ketë, të jetë e “gatshme të organizojë zgjedhjet parlamentare’.

Për të dje këto mundësi ishin më të lehta. Ajo theksoi se kurdo që udhëheqësit e vendin vendosin për datën e zgjedhjeve, KQZ-ja në afatin kohor do t’i organizojë ato.

Ndërkaq, sot Daka deklaron diçka tjetër. Kryetarja e KQZ-së thotë se nëse shpallen zgjedhjet e përgjithshme për 8 qershor dhe Kuvendi shpërndahet më 5 maj, do të jetë kohë e shkurtër për organizimin e zgjedhjeve nga ana e Komisionit Qendror Zgjedhor.

Ajo tha se afati prej rreth 32 ditësh për KQZ-në do të ishte kohë e shkurtër dhe sfiduese. Megjithatë, shtoi se nëse zgjedhjet shpallen nga presidentja, KQZ-së nuk do t’i mbetet tjetër vetëm që të kryejë detyrën e saj.

Data 8 qershor është propozuar nga kryeministri Hashim Thaçi. Për këtë çështje ai ka biseduar edhe me presidenten Atifete Jahjaga. /Telegrafi/