Curri: Kosovarët nuk duhet të largohen nga Kombëtarja shqiptare
RajoniPress
11:47, 7 Korrik, 2016
Debatik Curri, ish mbrojtësi i Kombëtares shqiptare, është kundër largimit të futbollistëve kosovarë nga ekipi kuqezi. Debatik Curri do të mbahet mend gjatë si një prej mbrojtësve më të mirë të Kombëtares gjatë dekadës së fundit. Futbollisti kosovar u bë pjesë e kuqezinjve në vitin 2006 duke luajtur me Shqipërinë për tetë vite.
Ka qenë titullar i padiskutueshëm në shumicën e takimeve që ka zhvilluar duke lënë gjurmë. Ai është aktivizuar në 44 ndeshje me Shqipërinë duke shënuar edhe një gol. Ish-mbrojtësi i përfaqësueses shqiptare ka mendimin se lojtarët aktualë kosovarë duhet të vazhdojnë të luajnë për fanellën kuqezi.
“Sigurisht, futbollistët do të vendosin vetë nëse do të qëndrojnë apo do të largohen. Është një vendim krejtësisht personal. Por, për të mos ndikuar negativisht në të dyja përfaqësueset, mendoj se futbollistët kosovarë, që janë aktualisht pjesë e Shqipërisë, duhet të vazhdojnë të qëndrojnë’, ka deklaruar ai.
“Është krijuar një grup cilësor dhe përpara janë edhe eliminatoret e Kampionatit Botëror ku kuqezinjtë mund të bëjnë diçka. Dhe nëse unë do të isha në vend të tyre, pa dyshim që do të zgjidhja të vazhdoja të luaja për Shqipërinë”, shprehet fillimisht ish-mbrojtësi kuqezi, përcjell “Panorama Sport”.
Ish mbrojtësi i Tiranës, Flamurtarit të Vlorës, Vorskla Poltavës mendon se përfaqësueses së Kosovës mund t’i bashkohen vetëm 2 apo 3 lojtar nga përfaqësueset e tjera si Zvicra e Shqipëria.
“Është përfolur se përfaqësuesja kosovare do të fuqizohet me lojtarë që do të vijnë nga Shqipëria apo Zvicra. Megjithatë, mendoj se Kosova do të vazhdojë të ketë atë kontingjent lojtarësh, përveç ndoshta 2-3 afrimeve. Nuk duhet të nxitohet, pasi është ende herët. Do të dalin breza të rinj futbollistësh në vazhdim dhe në këtë mënyrë do të krijohet një grup solid për të ardhmen. Ka ende kohë dhe nuk duhet që të ngutet”, tha Curri.
I pyetur nëse ekziston mundësia që të luajë për Kombëtaren e Kosovës, ish-mbrojtësi thotë se ka mbyllur gjithçka. “E kam mbyllur gjithçka për sa u përket përfaqësueseve. E kam deklaruar dhe nuk do të luaj më për asnjë kombëtare”, ka përftuar Curri.
Javët në vazhdim priten me shumë interes për të parë nëse do të ketë lojtarë që do të largohen nga Kombëtarja shqiptare apo jo.
