Cungu: Kukësi do të kujtohet gjatë

Armando Cungu, trajneri i Kukësit, ka vlerësuar lartë paraqitjen e skuadrës së tij në ndeshjen e kthimit kundër Trabzonsporit 3:1. Por, ai mendon se në këtë takim gjyqtari çekut Libor Kovarik, i ka dëmtuar.

Në konferencën për shtyp pas ndeshjes, trajneri i Kukësit tha se ekipi që drejton, do të kujtohet gjatë në futbollin shqiptar. Cungu e cilësoi këtë edicion si kulmin e klubeve shqiptare në Evropë.

“Për mua ishte një mbyllje me dinjitet. Edhe pse humbëm, treguam se kemi një skuadër me vlera dhe mund të ballafaqohemi si të barabartë. Unë mendoj se ky është kulmi i futbollit shqiptar, jo vetëm i Kukësit. Sot (dje) pamë një ndeshje të mirë, teksa kishim më shumë mundësi se sfida e parë. Unë nuk dua t’i gjykoj arbitrat, por goli i parë i turqve duhet të ishte anuluar, pasi lojtari që shënoi, ishte në pozicion jashtë loje. Ky ishte një moment shumë i dyshimtë, ndërsa goli i dytë që pësuam, ishte më tepër një aksident. Arritja më e madhe ishte se luajtëm më mirë se në Tiranë”, ka thënë ai.

“Në shumë momente ne ishim të barabartë në fushë, teksa arritëm të kalonim në avantazh ndaj një ekipi të madh, në një stadium të jashtëzakonshëm. Meritë kanë të gjithë, jo vetëm për këtë ndeshje, por edhe për ecurinë e deritanishme. Dua të falënderoj pa përjashtim çdo përfaqësues të klubit dhe të gjithë ata që na kanë mbështetur në këtë verë të jashtëzakonshme. Kjo që bëmë ne do të mbetet gjatë në kujtesën e tifozëve, ndoshta për dekada të tëra”, theksoi Cungu.

Kukësi, edhe pse nuk arriti të kualifikohet në fazën e grupeve të Europa League, ka hyrë në histori të futbollit shqiptarë, si skuadra e vetme që ka arritur deri në play off.