Çun Lajçi ua “mëson” atdhedashurinë, rinisë në diasporë

Me më shumë se katër dekada karrierë mbi supe, Çun Lajçi, vazhdon të jetojë me aktrimin.

Aktori i “dheut që nuk blihet e as nuk shitet”, i cili mbajti lart moralin gjatë viteve më të vështira për popullin shqiptar, tani pas shtetësisë së vendit vazhdon të mbajë gjallë frymën patriotike në këtë art fisnik. Së fundmi, ai ka përcjellur fjalët e Gjergj Fishtës, tek të rinjtë shqiptar të mërguar në Suedi.

“Merreni me mend!

Para tre javësh, një bashkatdhetar yni, që jeton e vepron në Suedi, me thërret e më thotë: Çun Lajçi, unë të paguaj honorarin dhe shpenzimet e udhëtimit dhe të qendrimit ne Suedi, veç eja të lutem dhe me vargjet e Fishtës tregoju rinisë shqiptare se si recitohet dhe çka është patriotizmi fishtian, se fatkeqësisht kanë filluar me u marr me gjithçka dhe gjuhën e nënës gradualisht po e harrojnë'” ka shkruar Lajçi në rrjetin social Facebook, duke vlerësuar lartë këtë nismë.

Tutje, aktori e ka falënderuar zotëriun publikisht, duke shtuar se: “Të rrallë janë njerëzit e tillë që për kulturën e popullit të vet, nuk e kursejnë paranë e fituar me djersë.” /Indeksonline/