Coop: «Për mua dhe për ty, por jo për shqiptarët»

Në Coop City të Lozanës, shitore e njohur e mallrave, është vendosur për disa orë një pllakat me një mesazh në gjuhën shqipe. Një qytetare kosovare dhe studente zbulon e zemëruar pllakatin dhe reagon nëpërmjet mediave zvicerane.

“Si mund të konsiderojë Coopi popullatën shqiptare më shumë abuzuese se popullatat e tjera”, shtron pyetjen me zemërim Jeta Zeqiri.

Të martën pasdite Jeta Zeqiri zbulon në Coop City të Lozanës një pllakat të hartuar posaçërisht për shqiptarët. Vërejtja e shkruar në gjuhën frënge ishte e përkthyer edhe në gjuhën shqipe (me shumë gabime gjuhësore) dhe synonte të parandalojë keqpërdorimin e produkteve kozmetike në shitje. Pas reagimit të studentes së lartpërmendur, pllakati në fjalë është tërhequr nga shitorja.

Gjatë pushimit në drekë, Jeta, studente e komunikacionit, kishte shkuar për të blerë ushqim para provimit të saj të fundit, kur zbulon e tronditur mesazhin në pllakat. Sapo përfundon provimin, studentia kosovare shkon menjëherë të njoftojë përgjegjësit e dyqanit për gabimin e tyre teknik sa i përket rregullave për komunikim. “Unë përpiqem të përcjell atë që mësoj”, shpjegon Jeta Zeqiri për “20Minutes”. Me pak ca ironi, Jeta rikujton publicitetin e Coop-it, duke i dhënë prapashtesën e saj: “Për mua dhe për ty, por jo për shqiptarët”.

Nga ana e Coop-it, përgjegjësit tregojnë se qëllimi i tyre nuk ishte “të fyejnë apo të fajësojnë dikë”. Problemi është te lirimet. “Ne propozojmë testimin e produkteve standarde dhe jo të atyre që janë në lirim”, shpjegon zëdhënësja e Coop-it, Sabine Vulic. Shkrimi në gjuhën franceze synonte së pari të njoftojë klientët e zakonshëm. Sipas saj, bashkëpunëtorët shqiptarë kanë marrë vetë iniciativën për të përkthyer pllakatin në gjuhën shqipe, meqë disa konsumatorë nuk e kuptojnë frëngjishten.

Albinfo.ch do të ndjekë nga afër këtë çështje.

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).