Çollaku: Më vjen keq se si Haradinaj e Limaj po manipulohen prej Albin Kurtit

Ministri i Integrimeve Evropiane (MIE), Bekim Çollaku, në emisionin “Info – Box” të TV Dukagjini, duke folur për reagimet e opozitës kosovare, veçanërisht reagimin e mbrëmshëm pas arrestimit të deputetit të Lëvizjes Vetëvendosje (LVV), Albin Kurti, ka theksuar se i vjen keq se si dy liderë të nderuar sipas tij, si kryetari i Aleancës për Ardhmërinë e Kosovës (AAK), Ramush Haradinaj dhe ai i Nisma për Kosovën, Fatmir Limaj, “po bien pre e demagogjisë së liderit të LVV-së, Albin Kurti”.

Ai ka thënë se është momenti i fundit kur politika duhet t’i thërras arsyes, dhe të ftohen gjakrat sipas tij, duke shtuar se “është e pafalshme që të shikosh adoleshentë të cilët godasin motrat dhe vëllezërit e tyre të cilat janë në krye të detyrës”.

“Nëse kemi anarki në vend, atëherë është e pakuptueshme të flasim për integrime evropiane. Shenjat fillestare, që po i shohin tash, janë shenja të anarkisë. Liderët e LVV-së kësaj po e manipulojnë elektoratin dhe militantët e vet”, ka theksuar Çollaku.

Ai ka folur edhe për zgjedhjen e kryetarit të Partisë Demokratike të Kosovës (PDK), Hashim Thaçi si president i vendit, duke e quajtur këtë si një çështje të mbyllur. /Telegrafi/