“Çmendet” Salihi, dygolwsh në Izrael

Është momenti i Hamdi Salihit. Sulmuesi i Kombëtares shqiptare ka shënuar dy gola në ndeshjen e djeshme të Hapoel Akre në kampionatin izraelit në transfertë ndaj Hapoel Ra’anana. Salihi e nisi lojën si gjithnjë si titullar dhe në minutën e 17-të të pjesës së parë shfrytëzoi më së miri një gabim fatal të mbrojtjes vendëse.

Mbrojtësi Hernan i Hapoelit mendoi që ta pasonte topin me kokë pas te portieri, por harroi se kishte nga prapa Salihin. Shkodrani, si një snajper i vërtetë, shfrytëzon rastin dhe i vetëm përballë portierit nuk e ka të vështirë që të kalojë në avantazh skuadrën e tij. Me këtë rezultat u mbyll pjesa e parë në të dytën është sërish protagonist Salihi.

Këtë herë, në minutën e 51-të, shkodrani ktheu në gol një pasim të artë të dhënë nga Lubanoviq dhe nga vetëm 6-7 metra me portën, përballë e dërgon qetësisht topin në rrjetë. Ky ishte edhe goli që vulosi takimin dhe i dha fitoren e parë Hapoel Akres./Arena/