Cliff: Për disa asete të Trepçës, vendos Serbia

Ambasadori i Britanisë së Madhe në Kosovë, Ian Cliff, ka bërë të ditur se biznese angleze janë të interesuara për Trepçën. Por ka shtuar se kjo çështje është e komplikuar, pasi që disa asete të saj gjenden në Serbi, dhe siq thotë ai ‘për këto asete i takon Serbisë që të vendos se çfarë do të ndodhë me to’.

Për këtë temë, ambasadori Cliff ka folur gjatë një interviste dhënë për politico.net.

Cliff po ashtu ka shtuar se biznesët britanike që kanë qenë të interesuara për Trepçën, janë edhe të dëshpëruar me qeveritë e kaluara të Kosovës, që nuk kanë hartuar një vision të qartë se ku duhet të arrijë Trepça.

“Është shumë e qartë se nëse do të ketë një lloj partneriteti strategjik ndërmjet Trepçës dhe kompanive minerare britanike, apo amerikane e gjermane, asetet bazë (siç janë minierat, flotacioni, ndoshta shkritoret) duhet të nxirren prej Agjencisë së Privatizimit. Përkundër se nuk ka aktualisht bord dhe shef ekzekutiv, të gjitha vendimet e agjencisë duhet të shkojnë përmes Dhomës së Veçantë të Gjykatës Supreme”, ka thënë Cliff.

Ajo që investitorët preferojnë është një person, një Zotëri Trepça, me të cilin ata mund të flasin për këto asete bazë. Por, në publik ka shumë konfuzion në lidhje me Trepçën ka shtuar ai.

Ka edhe asete të tjera që i takojnë Trepçës, e që nuk kanë të bëjnë asgjë me punën minerare moderne, disa prej të cilave duhet të zgjidhen. Disa prej tyre gjenden në Serbi, kështu që i takon Serbisë se çfarë do të ndodhë. Pastaj, është çështja e ndërlikuar e borxhit, ka thënë ndër tjerash Cliff.

Ai ka treguar po ashtu se kompanitë britanike që kanë qenë të interesuara për Trepçën, me ndihmën e institucioneve financiare në Mbretërinë e Bashkuar, ka sugjeruar të krijojmë një fond detyrimi, përveç parasë që mblidhet për modernizim dhe pastrim ambiental nga privatizimi, që ai të vendoset në një xhirollogari të ndarë në disponim për pretendime të ardhshme të cilat munden ose jo të gjykohen vlefshme. E atëherë vazhdohet me biznesin e modernizimit dhe investimit.

Kurse problem tash me Trepçën nën AKP dhe nën këto procedura të ndërlikuara është se secili ka qenë duke pritur që së pari të lahet borxhi. Ka argumente se bëhet fjalë për 1.4 bilion. Unë personalisht nuk besoj që shuma është aq e madhe, sepse shumë prej atyre pohimeve janë nga periudha e Miloshevicit; dyshoj që janë valide. Politiko.net