Çfarë është thënë për Zahirajt dhe çfarë paralajmëronte Rexhep Tahiri

Gjilan – Rexhep Tahiri ishte banori i fundit që e braktisi lagjen e Zahirajve. Ai kishte paralajmëruar me kohë se nëse nuk investohet në rregullimin e rrugës dhe nëse nuk ndihmohen ata pak banorë Zahirajt do të shuhen. Dhe vërtet kështu ndodhi, tani Lagja e Zahirajve është e braktisur dhe e pabanueshme.

Rexhep Tahiri ishte banori i vetëm aktiv që jetonte për ballë ushtrisë dhe xhandarmërisë serbe. Ishte i vetmi që foli hapur për Zahirajt dhe mbrojti hapur teorinë se Zahirajt janë pjesë e Kosovës. Asnjë qeveri lokale pothuajse nuk është marrë me problemin e Zahirajve.

Rexhep Tahiri jetonte me ato kushte që kishte atje, por ai rrezikonte shumë. U bënte ballë edhe provokimeve të ushtrisë serbe, vetëm që rezistenca e tij të kuptohej se aty është tokë e Kosovës.

Por, shpresat e Rexhep Tahirit u shuan në momentin kur asnjë qeveri komunale e qendrore nuk u morr seriozisht me kërkesën e tij që të ndihmohet e përkrahet ai dhe ata pak banor atje.

Tani Zahirajt si lagje janë shuar dhe në kujtesë kanë mbetur vetëm ato momente që Rexhep Tahiri i ka përjetuar me familjarët e tij përballë xhandarmërisë serbe.

Çfarë dihet për Zahirjat dhe pse u injorua me vite problemi i saj. Edhe pse Lagja e Zahirajve gjithmonë ishte pjesë e Kosovës ajo pas luftës ka mbetur si pjesë kontestuese dhe realisht shteti i Kosovës nuk ka pasur qasje asnjëherë.

Zahirajt ishin pjesë territoriale e Kosovës, por pas luftës hartat e KFOR-it dhe bisedimet e Kumanovës e lanë brenda kufijve artificial të Serbisë.

Tash pas 19 vitesh Zahirajt që tashmë e kanë braktisur fshatin nuk i ka vizituar askush. Dikur ishte Pajazit Zahiri dhe Rexhep Tahiri që bënin roje në atë lagje, e ka tri vite që edhe ata pothuajse janë shpërngulur.

Rexhep Tahiri i cili tashmë jeton në Gjilan thotë se është detyruar që ta braktisë fshatin. “Nuk na donte askush dhe nuk na përkrahte askush. Komuna e Gjilanit nuk investonte dhe nuk na përkrahte. U detyrova që ta braktisë vendlindjen nga kushtet e rënda dhe nga provokimet e xhandarmërisë” shprehet ai.

“Unë e di që Zahirajt janë problem politik dhe realisht edhe tejkalon nivelin komunal, por të paktën me pak investime Komuna e Gjilanit duhet të tregoj se nuk e kanë harruar trungun e saj. Po t`i kishim pranuar kushtet e Serbisë, sot Zahirajt do të kishin të gjitha kushtet. Ne nuk kemi pranuar dhe nuk do të pranojmë asnjë investim që vjen nga shteti serb. Kam pasur shumë shpresa se Komuna e Gjilanit, meqë posedon tërë dokumentacionin kadastral do ta zgjidhë çështjen e rregullimit të rrugës e cila nuk ka më shumë se dy kilometra” shprehet Tahiri.

Tahiri nga Zahiraj thotë se modeli që pritet ta aplikojë KFOR-i dhe ushtria serbe në Karaqevë duhet të vlejë edhe për lagjen e Zahirajve.”Ne padrejtësisht jemi futur në kontestin kufitarë me Serbinë, edhe pse gjithmonë Zahirajt kanë qenë pjesë e Kosovës. Të gjitha tatimet dhe obligimet komunale i kemi paguar dhe i paguajmë në Gjilan”shprehet ai.

Lagja e Zahirajve para luftës ka pasur 10 shtëpi. Problemin kryesor ata e kanë se rreth 150 hektar tokë u ka mbetur përgjithmonë në pjesën e Serbisë, kurse shtëpitë e tyre ende figurojnë në hartat e KFOR-it dhe hartat serbe si pjesë të Preshevës./rajonipress/